樓市興旺，但係地產代理行競爭仍然激烈。幾間主要代理行都話，今年會投放多啲資金去做宣傳。
好似上市大行美聯物業，早排至話受發展商減佣影響，要發出盈利警告，但噚日喺精英會上，主席黃建業透露，今年宣傳費加碼到一億五，差唔多接近97年高峯期億七嘅數。突然間好似前景一片美好咁樣。
另一大行中原地產就話，雖然今年預計動用嘅宣傳費，唔夠97年成兩億咁勁，但比起舊年就多六成，即係一億，都唔嘢少。
中型行利嘉閣地產，執行董事廖偉強話，今年宣傳使費，預計係四千萬。數目冇兩間大行咁多，不過比舊年都大增八成。
間間代理行都話係咁掟錢，咁睇，樓市係咪應該有排旺呢？
市場噚日傳出，一直活躍於舖位市場嘅舖王「波叔」鄧成波，罕有地買入住宅項目，購入嘅係有四十年樓齡，何文田山道二號天次樓，六個單位連六個車位，總值四千三百八十萬。
蘭西走去問波叔，佢話唔係佢買喎！而係住南區啲好友買。不過，佢去睇過樓，可能就係因為咁，啲人咪以為係佢買囉。
無論係點，呢幢住宅大廈來頭唔細，因為其中五樓A室，有「地產神童」之稱嘅羅兆輝，曾經入住過，而擁有毗鄰何文田山道一號業權嘅新地，亦曾經計劃收購上址業權，可借最終失敗。
今次賣出嘅單位，全部面積二千四百呎，五個係二至六樓B室，一個係五樓A室，部份連租約，每呎月租十蚊，上手業主喺92年，以二千五百萬買入，賺一千八百八十萬。
豪宅大手掃貨不斷湧現，造價一浪高過一浪，唔少業主短時間轉手賺錢，最近竟然重有轉兩轉㖭。
香港置業高級營業經理夏笑笑話，貝沙灣啱啱有件貨，短時間兩度易手，高層兩房，一零五六方呎，喺一月以五百八萬沽出，賣方執到七十二萬。點知兩個零月，再以七百二十萬轉咗畀個用家，賺百四萬。件貨一共升值逾四成。
貝沙灣除咗多轉手獲利，𠵱家重出現轉兩轉都有錢賺，都算係奇盤嘞。
蘭西
電郵地址：
