秋官效應困擾咗港股5日，恒指夾埋唔見咗600幾點，到噚日先升番13點，重係靠尾市滙控（005）嘜高一個位，而滙控除息前夕，期指低水亦大幅收窄到62點。
通常除息之日，滙控多會上升，相信今次亦唔會例外。另外，記憶所及，長實（001）同和黃（013）派完成績表，大市多會造好，所以，港股好大機會喺未來幾日出現反彈，上番13200至13300水平，然後再試過底。
早輪推介過兩隻航運股，東方海外（316）同金輝集團（137），噚日兩者走勢迥異，東方海外收24元，升1.1元，升幅4.8%；金輝則收28.5元，跌1.7元，跌幅5.6%。推介東方海外時，股價係27.25元，而推介金輝時則係26.5元，到現時為止，前者股價下跌，後者仍有進帳。
東方海外轉弱勢，主要係有大行大幅調低其目標價所致，其股價更一度跌到20.55元，到近兩日才回升。其實，大行多數仍看好東方海外前景，並維持目標價在33元至34元水平。東方海外月前配售，九成九貨源亦係由基金接去。
東方海外將於本周五（19日）宣布末期，預測03年度（12月年結）每股盈利係0.62美元，04年及05年可上升至0.71美元同0.8美元（已經配股調整），折算港元分別為4.8元、5.5元同6.2元，以04年PE6倍計，股價已可見33元。今次末期，派息若有驚喜，反彈之勢會更急。
至於金輝，呢幾日都好大波動，分別插落22元，又升上33.8元，走勢則形成下降通道，升破降軌阻力，可重上4字頭。
金輝最近斥資3530萬美元，收購日本一艘5.55萬噸輪船，將於05年2月至5月交收，令集團的盈利能力更為加強。金輝現時旗下船隊有22艘，其中10艘係自資擁有，踏入04年，集團已將旗下70%的船隊以不定期或3個月期的合約租出，平均運費上升3倍，而呢輪運費重一路上升，預期04年度（12月年結）盈利可再調升至6100萬美元，每股盈利9.2元，PE5倍計，目標價係46元。
郭兆誠