近排唔少工業股公布業績，表現多數唔錯，好似光星電子（2310）剛公布全年業績，盈利有7604.5萬元，比上年同期增長20.4%，股價有良好反應，升10.9%，收1.83元，但成交股數只得352萬股，金額625萬元。
光星始終成交唔夠大，似乎唔係太多人欣賞，但經紀黃話，光星貨源主要在芬佬手中，就算早幾個月前，有份湊佢上市嘅星洲芬佬唔玩時，隨即有另一家星洲基金接貨，而且佢哋重密密增持，似乎相當睇好光星。
除咗光星業績唔錯之外，聽講將於3月24日公布中期業績嘅唯冠國際（334），業績都係好靚仔，可留意短炒。
唯冠去年公布與摩托羅拉合作，股價曾經平地一聲雷，彈過上去最高2.45元，但之後傳出合作計劃會拖遲，股價已經回落唔少，噚日平收1.85元，成交縮至154萬股，金額281萬元。
經紀黃話，唯冠除咗傳聞業績好之外，據講與摩記嘅合作亦冇變，或者在業績公布會中有提及。
慕容小初