新界鄉議局噚日開會，講到九月立法會選舉，個個摩拳擦掌，想喺立法會增加鄉事勢力。主席劉皇發唔知係咪麻雀癮起，多次以打牌為喻，話登記做選民嘅新界居民就如同鄉事勢力嘅賭本，要贏人一定要賭本夠多，所以噚日通過成立專責小組，策動大型選民登記活動。
西貢鄉事委員會主席鄧光榮及大埔鄉事委員會主席張學明提議，千四位村長，每人搵二十個未登記嘅村民做選民，咁就有二萬八個新增選民。鄧光榮愈講愈得意忘形，話如果攞到四至五個議席，佢哋就可以「要風得風、要雨得雨，喺立法會打橫行都得」。
係咪可以打橫行，九月就有分曉，不過講到鄉議局新會址，最快都要兩年後先落成，發叔話佔地四萬呎嘅新會址位於沙田，會起嶺南式大宅，但籌幾千萬建築費都幾頭痛，有人提議請名伶蓋鳴輝去歐洲唱大戲，可能因為歐洲多新界佬，有一定叫座力。
傳真︰2623-9278
電郵︰