真係好老土，都算做咗十幾年電影，導演了好幾齣戲，但每次臨近開鏡，總會覺得心緒不寧，像小學生明天要去旅行一樣，晚上緊張得睡不安穩，早上又會紮醒。
這次開戲正值冬去春來的時分，一年一度來襲的鼻敏感加上日夜顛倒的工作時間，演變出一個耳塞怪症。無端端的突然左耳塞了，就像是搭飛機時氣壓產生的耳塞，初時不以為意，耳塞經常有，大部份時間是打個大呵欠便豁然開朗，「波」的一聲便路路暢通，但這次無論怎樣打呵欠，真的假的都打不開這左耳通道，苦惱不堪。
既不癢，也不痛，淨係塞。足以煩死人，原來塞了左耳會導致整個感官世界有改變，首先是聽覺減弱了，平時講說話蚊滋咁細聲的朋友統統被喝令要提高聲量，但低音頻卻是入心入肺，偶爾經過CD舖正播放強勁音樂時，低音像是變成實質的力量，一拳一拳的打埋嚟，走都走唔切。
看過醫生後，心情好了點，因為經過檢驗後，醫生說：「你乜事都冇，淨係耳塞啫。」身體有萬七咁多件零件，只是其中一件出了小毛病便周身唔舒服，都係嗰句，奉勸大家好好保重身體健康，平時唔覺，一有咩事就好覺，多多錢都買唔番。