雖然話就話民主派就九月選舉進行協調，但係內憂外患，安民、曾憲梓、狗餅庸等謾罵圍攻，本身如港島區，民主派內部其實重有好多嘢未傾，好似余若薇、梁家傑同何秀蘭條隊，點排法就未坐低傾過。秀姐話，雖然佢同余若薇都講過冇乜所謂邊個排第三，但係講得多，人哋以為佢哋選唔選到都冇所謂，所以不如唔好再執着先後，做多啲實務好過。
講番李柱銘，佢老哥去美國，本來合情合理，但謊言同恐嚇，重複一千次，點都有啲人信，目前睇嚟，都係要多謝安民點佢阿爸李彥和名，瘋狂大批判佢兩仔爺，李柱銘嘅支持度變成有增冇減，有消息話，馬丁可能會棄港島過海去九龍東，以保萬無一失。
不過，八方亦聽過，有人建議民主派喺港島出五張名單，自我配票，以身份證號碼最後一個數字嚟分，1同2投第一個余若薇，3同4投梁家傑，5同6投何秀蘭，7同8投楊森，9同0投李柱銘，咁樣投，一人攞十幾百分比可勝出，大家不妨諗吓。
傳真︰2623-9278
電郵︰