英國搖滾歌手大衛寶兒（DavidBowie）前晚喺會展開完演唱會，噚日已經搭下晝機離開咗香港，佢臨走時重盛讚香港觀眾excellent！不過佢喺演唱會介紹到法輪功成員、鼓手Sterling時，就輕輕帶過，唔知係咪怕敏感呢。
講番個演唱會，就真係冇得頂喇！大衛寶兒唔單止唱咗好多首經典名曲，佢成晚重好風趣，又扮觀眾揮手。轉頭大衛寶兒又搬咗一件佢一九六八年喺香港用兩個半港紙買嘅特別樂器上台，即時表演兩嘴，冧到全場情緒高漲。
演唱會完咗，大衛寶兒就拉大隊去中環中國會慶功兼消夜，佢重俾記者圍到落唔到車，架Benz惟有直駛入停車場。
大衛寶兒一入場就有二胡liveband助興，自助餐就係港人至愛嘅蝦餃、燒賣、牛肉球呢類茶樓點心，重請咗一對男女着晒唐裝唱粵曲《鳳閣恩仇未了情》，而呢位搖滾巨星亦相當enjoy東方文化。中國會老闆鄧永鏘、MaggieQ都有捧場，MaggieQ臨走重大讚話：「verynice！真係唔似真實年紀咁老，喺台上好有活力！」不過佢就話冇攞簽名。
郭羨妮噚日一身春裝打扮，喺金鐘出席肯尼亞領事館開幕禮，佢話六月會隨大隊出發往肯尼亞拍攝電視劇《天涯俠醫》．而戲中佢會同張家輝有一場情慾戲，之後重會有咗BB㖭。佢今次扮大肚婆就好認真，唔係攝枕頭就算，有化妝師同佢喺心口至肚度倒模，用實心海綿做肚嘅材料，令佢可以親身感受為人母親嘅重量。
啱啱加入無綫劇集《皆大歡喜》嘅羅浩楷，日前出現心痛情況，其後重被安排喺深切治療部留醫，𠵱家重要等醫生報告。薛家燕好關心羅浩楷嘅病情，佢話：「羅太話佢病情好穩定，應該係突發性心臟病，佢其實平時朝朝跑步。𠵱家佢休息緊，惟有先拍其他戲份。」
許冠傑（Sam）即將復出，無綫希望可以搵阿Sam做番個特輯，雖然阿Sam目前仍在考慮中，但馮仁昭知道阿Sam首《04祝福你》嘅MV，將會安排喺無綫《勁歌金曲》首播，對等咗好耐嘅阿Sam歌迷嚟講，當然係好消息啦。但噚日阿Sam出街買報紙都俾狗仔隊跟，搞到佢就唔多高興。
楊恭如噚日晏晝出現喺赤鱲角機場，身邊重有佢形影不離嘅媽咪以及幾個類似親戚嘅太太團，楊恭如話係同媽咪去北京喎。之前傳咗好耐話楊恭如經濟有問題，所以要拍多啲劇，連半山嘅豪宅都唔可以繼續租，不過馮仁昭反而覺得，如果冇錢又點會一陣去北京，一陣去上海，一陣又去台灣呀，爛船都有三斤釘嘅。
由鄭少秋同汪明荃擔大旗嘅《血薦軒轅》，首周收視得二十七點，跌咗四點，股市都一齊跌，秋官一出，丁蟹效應又返嚟，過去半年都穩步上揚嘅股市，竟然喺套劇出第二日，即刻跌過百點，都咪話唔邪！重有無綫諗住玩新意，拍電視電影，點知一連幾個禮拜都收到投訴，上個禮拜套《親密殺機》又收到投訴話太大膽啦！
