噚日「一國兩制」研究中心同政制事務局等組織聯合舉辦基本法頒布十四周年座談會，梁振英好識做，內地護法大噴口水，為港人補了一課「真民主」之後，都畀番幾分鐘林瑞麟喺台下講吓嘢。
林局長見機不可失，可以喺幾位老人家面前威吓，就用佢極有改善空間嘅「普通話」發言，一時講基本法是活的，「一國兩制」是有生命力的；一時又講中央有憲法審視權力同責任審視香港政制的發展。
八、九十歲嘅法律專家，聽得林公公話阿媽係女人，一個個面露倦容，更何況講兩講，林局長自己條脷捲到打晒結，真係要知佢講緊乜都唔容易。
邵老可能有聽覺障礙聽唔到，許崇德又識聽少少廣東話，林局長其實唔使咁辛苦。
人哋胡漢清資深大律師就醒好多，一起身即講明用廣東話，「因為尊重啲專家，唔好虐待佢哋隻耳朵」喎，廖長城亦都係咁嘅原因用廣東話發言，俾人明寸，林局長快啲惡補啲國語啦。
傳真︰2623-9278
電郵︰