中央果然陸續有大禮送，兩會一開完，即時再空運蕭蔚雲、邵天任、許崇德來香港，展開說教疲勞轟炸第二回大行動。
蕭蔚雲話，《基本法》冇錯係冇「愛國」兩個字，但唔可以睇「字面」，最緊要睇「原意」同「精神」。「原意」係乜嘢？「精神」又係乜嘢？喺一個法治社會，法律就係講白紙黑字嘅條文，紙上冇寫到嘅，就係冇。大陸喺度猛講「以法治國」，雖然呢四個字，冇講到「法治大過共產黨人治」，但一樣可以話，呢四個字嘅「原意」，係喺「共產黨指導之下」嘅「法治」，其「精神」，亦係「以法治國，不過同時亦要以黨治國」，冇講到後半句，不等於冇咁嘅意思。
有白頭蕭咁嘅「法律專家」，中國毋須建立「法治」。其實無謂諗住「與國際接軌」吖，唔接軌都一樣咁好，保持世界文化多元嘅豐富多姿。例如巴布亞新畿內亞，都重有好多生番食人族，佢哋冇微波爐，冇傳真機，捉到啲生人，就劏嚟食，重將個人頭製成紀念品。聯合國好多文化專家，都呼籲要保護呢亭咁另類嘅民俗文化遺產，畀全世界都一樣咁現代化，咁呢個世界咪好悶？
跟住啲「護法」又話，五十萬人大遊行，唔代表民意。「沉默的大多數」，先至係民意。冇錯，年年七一「慶回歸」嘅喺金紫荊廣場參觀扯旗，政要富商、三屍十一焗，年年都只係得嗰一小撮幾十人，加埋區議會一班土共小貓三四隻嘅園遊會，六百萬人大多數都好沉默，佢哋沉默嘅大多數民意，就梗係唔認同「七一回歸」，而係反回歸，同埋好懷念殖民地管治喎。
至於許崇德，就以「受害人」身份，好激動咁大罵「支聯會」將佢幅玉照打交叉，係危害佢嘅「人格權」、「名譽權」、「肖像權」。咁中方官員及土共大罵李柱銘係「漢奸」、「賣國賊」，又有冇威脅到媽田嘅人格權同埋名譽權？淨係你嘅人格高尚？淨係你嘅名譽昂貴？人哋又點？「己所不欲，勿施於人」，有你抹黑誹謗他人，不容人哋以《基本法》保障嘅表達自由去辯駁，呢啲就係極度自私。只知有己、不知有人，世界上有一個咁嘅鄰居，淨係佢可以將啲污水亂咁潑出街、四圍吐痰，你勸佢要有公德心，你就係侵犯咗佢嘅生存權，呢戶人家有乜法子唔神憎鬼厭？
唔知係邊個將呢亭「護法」多次空運來香港獻世？除咗想激到啲老人家病，直頭係靠害中國。
佢呢頭猛咁講「以法治國」，你呢頭就一次次咁要佢現形，請問中央同呢啲搞屎棍有乜深仇大恨？係冇畀個官佢做？係畀錢畀唔足？一個國家冇咗宗教，人心可以咁險惡，點解會咁，真係一個謎。
（圖）兩會一開完，中央即時空運（左起）蕭蔚雲、邵天任同許崇德嚟香港，果然有大禮送，認真多謝。
區民傑攝
傳真︰2623-9278
電郵︰