香港主場對中國世盃外圍賽開始進入最後十五日倒數，國足進行集訓備戰已經有兩個禮拜時間，但有國足成員誇下海口，話對住港隊根本唔使咁長時間備戰！
國足到廣州三水訓練基地集訓有一段時間，有國腳話班球員𠵱家谷唔起狀態，可能同集訓時間太長有關，而主將孫繼海賽前先會由英國直接飛嚟香港，無時間同大隊練波，所以集訓初期根本練唔到預期效果。
不過，有國腳話對住香港隊，兩個禮拜備戰時間足夠有餘，所以跟住十幾日先至開始認真練波都未遲。我求大俠覺得國足有啲睇唔起港隊，到時港隊贏唔到波唔緊要，最緊要打出拼勁，等國足知道唔易啃！
巴塞隆拿愈踢愈勁，𠵱家重取代咗拉科升上西甲聯第三位，而佢哋嘅巴西攻擊球員朗拿甸奴亦都因為咁而人氣勁升，除咗之前同某體育用品公司拍廣告之外，最近重做埋FIFA2004PS2西班牙版代言人。喺記者會上朗拿甸奴重即刻露兩手，原來佢打機都一樣咁掂。
奧雲前日對修咸頓表現差勁，而且再次射失十二碼，傷透紅軍球迷嘅心。禮拜一出版嘅《倫敦晚報》引述最近涉嫌造馬嘅騎師范義龍說話，踢爆奧雲仔近年一直爛賭成性，幾乎每日都會問佢攞內幕貼士。假如奧雲仔真係好似報道咁講衰爛賭而影響場上嘅表現，就真係唔抵幫囉。
巴治奧前日對帕爾馬入咗個人意甲第二百球，總算了咗件心事。過去只有四位名將有相同成就，認真威盡。睇見偶像突破二百大關，巴治奧躉當然值得高興，只可惜佢賽後揚言今季後依然會掛靴，兼唔會再涉足球壇。如無意外，大家最多可以睇佢踢多九場，要珍惜啦。
施多夫不愧為祖雲達斯剋星，繼當年效力國米試過對祖雲達斯梅開二度後，前晚作客祖記又梅開二度，計埋佢交畀舒夫真高頂入嗰一球，AC三個波都有佢份，祖記守將真係多得佢唔少。講時講，自從佢響冬天剪短髮後一直當旺，暫時都係咪留長住啦。