因民企富豪話「張灼華」（證監會執行董事）嘅灼華係男仔名，問左丁山點解，昨日已經解釋咗。其實中國人父母，為子女取名，往往絞盡腦汁，好多名都取自四書五經、唐宋詩詞，我哋睇落去，唔多識，千祈咪笑、咪踩人，要返屋企查吓辭典先，或者上網搜尋，睇清楚至好，否則好容易出醜。嗰位民企富豪，大概個袋有錢財，把口就有文才，故此自暴其短。
富豪聽完左丁山講「灼華」呢個名好文雅，出自《詩經》，唔敢再指指點點，但係打橫嚟拗：「唓，張灼華係證監會中人，管股市，股票屬金，灼字旁係火，火燒金，股票俾佢燒死啦。佢做證監會，應該改名！」
幾乎俾佢吹脹，佢識啲唔識啲，好難頂。命書有云：我剋者如陰見陽、陽見陰，為正財（如辛陰金、以丙陽火為正財）；如陽見陽、陰見陰者（如庚金見丙火）為偏財；所以金以火為財，並非見到金就腳軟。何況論八字，庚金命往往以丁火為用神，因丁火火鍛金鍛煉，方得成才。不過呢啲道理，無謂免費為民企富豪上一課，慳番啖氣好過。
既然言不及義，講落去都係冇料到，飲完杯茶，立即起身鬆人。行返寫字樓之際，想起好多人唔讀書，會激親啲老人家。譬如個「華」字，大編輯曾經以「早生華髮」嚟形容何文匯，點知一名小記者問佢「乜嘢叫做華髮」，大編輯話「華髮即白髮」。小記者竟然話佢賣弄，大大聲講：「寫何文匯早生白髮，個個都明白，你咁寫讀者唔識㗎，我都唔識啦！」大編輯嗰次真係吹到脹咗！