雖然小倉優子可謂當今日本「妹系水着女星」嘅一姐，但查實佢已經二十歲，喺日本絕對係成熟女人一個。但小倉天生擁有好似初中生咁嘅童顏，同埋唔多突出嘅身材，着上校服依然好清純，所以最近佢俾人邀請拍咗本制服寫真集《小倉優子高校制服Collection》。
大家可能記得，十七歲嘅市川由衣都拍過同類型嘅寫真集，俾一班制服癖迷當係必備參考書，因為入面市川所着嘅，全部都係嚟自東京附近各地有名高中學校嘅校服。
而有啲食人口水尾嘅小倉，如果要突破，就更加要加料炮製，所以小倉嘅新寫真乜嘢都比人行多步，除咗去到更加偏遠嘅地方搜羅更靚嘅校服之外，重着埋PE衫，誓要啲有校服癖嘅fans再破慳囊。
小倉會喺今個月尾舉行握手會，落力宣傳佢新嘅校服寫真，到時佢同市川邊個先係制服女王，自然會有分曉。