有人話，胡漢清資深大律師好愛國，聽佢噚日喺基本法講座發言先知佢愛國又愛金。佢一企起身就話大會叫佢講五分鐘嘢，不過，佢有職業病，唔慣不收費講嘢，真係畀足面振英哥同邵善波。
之後佢當然唔止講五分鐘啦，大會好似叫佢講立法原則，佢就舉出大律師公會引起嘅極大誤會，包括係居英權，人哋以為大律師公會反對人大釋法，問佢哋先知佢哋唔係反對釋法，只係反對特區政府要求釋法。
至於23條，人哋以為大律師公會反對立法，問吓先知佢又係誤會，原來大律師公會唔係反對23條立法，只係反對特區政府嘅方案，講到最近嘅政改，佢哋又話係特區嘅事，備案可以，同中央冇關，搞到胡資深大狀好𢱑頭，猛話咁樣嘅訊息畀中央，如果係誤會就好大囉。
胡資深嗰檔基本法研究中心十月會開個基本法圖書館喺大會堂，點知佢老哥講咗人民大會堂，真係心懷祖國。
（圖）胡大狀咁好心，睇怕陳景生要搵佢做大律師公會嘅大公關。
傳真︰2623-9278
電郵︰