上星期財務伍話有一個民企富豪來港自由行，喺置地廣場猛咁掃貨之餘，亦想知道一下本港現況、民企上市之類嘅事，叫埋左丁山去見佢，睇吓有乜行當。呢啲係冇米粥啫，民企上市邊度會益到我哋，講都多餘，不過既然財務伍叫到，點都要畀面，於是去文華酒店咖啡室坐吓，諗住敷衍了事。
寒暄一輪，年紀約五十歲嘅富豪話：「我睇香港報紙財經版，見到一個人名叫張灼華，話係證監會高層，呢個名係男人名嚟喎，但睇張相就係女人，乜你哋啲女士用男人名嘅？好怪啫。」聽完都唔知好嬲定好笑，唔通呢位民企富豪要考我牌？望吓財務伍，佢立即話：「我係番書仔，外國留學，左丁山你話係唔係呀？」
五十歲左右嘅內地人，文革開始時（一九六六）係十二歲，文革結束（七六）係二十二歲，剛好錯過中學與大學讀書時間，冇乜讀書，非戰之罪，如果讀，都唔會讀古書啦，呢位富豪似暴發戶，睇佢舉止，聽佢談吐，應該係冇乜讀書，街頭碌大，因醒目而發達之類。但既然唔識，就立亂批評，話張灼華之灼華係男人名，可見其淺陋也。左丁山本來冇乜學問，但因為馬場有一隻馬叫做桃之夭夭（○二年周歲馬），英文名PeachBlossom，馬主陳禮文醫生。為咗呢個馬名，左丁山曾經查過辭典，桃之夭夭出自《詩經》：「桃之夭夭，灼灼其華。之子于歸，宜其室家。」桃之夭夭，就係「美盛的桃花」，「灼灼其華」，華者，花也，灼灼就係鮮明貌、色新鮮明也。所以「灼華」係指美麗嬌豔的花，當然係女仔名啦，聽日再講。