迷倒唔少香港人嘅日本卡通《機動戰士高達》，唔經唔覺已經有二十五年歷史，負責製作呢套卡通嘅SUNRISE公司會喺下月十號同十一號，喺九龍灣國際展貿中心破天荒搞個大型高達展覽，當日除咗有高達展覽外，重會有動畫主題曲演唱會。
呢次個高達展覽「GUNDAM&SUNRISEFESTIVAL」，會以「結合影音」為賣點，其中「機動戰士高達&SUNRISE全攻略展覽會」部份，除會播放多部《機動戰士》系列精華同「SUNRISE動畫作品發展史」，入場觀眾重可以率先欣賞《機動戰士特種計劃GUNDAMSEED》嘅最新片段！
喺展品方面，將有合共近一萬幅高達設計原稿畫同埋1比1機械人高達同渣古頭部展出，亦有高達絕版海報作首度公開展覽。
至於今次全場嘅焦點，係滙集港日歌手演出、喺十一號分作日夜兩場舉行嘅「日本偶像歌手動畫主題曲演唱會」。去年憑演唱《機動戰士特種計劃GUNDAMSEED》主題曲《believe》同《Realize》打上日本Oricon十大嘅少女新人王玉置成實，亦會現身演出。聽講本地男歌手方力申亦會參與㖭。