政府賤賣紅灣半島令市場回響好大，佔一半權益嘅新地高層近日頻頻視察，蘭西噚日下午茶之際，但見副主席兼董事總經理郭炳聯，率領一眾高層，包括執行董事黃奕鑑、鄺準、新地代理執行董事雷霆、總經理周國賢等在眼前走過，操入長實嘅都會軒第二座，蘭西第一時間上前了解，聽講話係上十八樓睇單位。
不過蘭西認為唔係咁簡單，皆因都會軒二座某啲單位，可以清楚鳥瞰紅灣半島，連景觀都睇得一清二楚，遠近觀察兼而有之。但當在場記者問郭炳聯，係唔係睇紅灣半島，佢只笑而不答。
上月郭炳江曾視察紅灣半島地盤，早幾日又喺業績發布會上，透露正研究改造方案，噚日就輪到郭炳聯現身，佢哋對呢個盤確實相當重視。不過，之後再問番新地有關人士，就解釋今次只係想感受吓個市場氣氛，無乜特別意思。不過去都會軒，可以感受市場乜嘢氣氛呢？
中原地產經過二十幾年，已發展成一家具規模嘅集團，有代理公司、測量行、中國部、網頁同地圖等好多唔同嘅子公司。雖然，創辦人之一嘅施永青已貴為集團主席，唔多理日常事務，但係大家對佢敢言形象印象深刻，所以外面嘅公司有活動，想請中記代表時都會諗起佢，搞到佢好唔得閒。
據中記高層講，其實施老闆好想將呢啲邀請活動，畀番合適嘅同事去，好似中原地產就由黃偉雄同張奕威負責；利嘉閣就係廖偉強同何紹章；測量行就係黎堅輝、中國部就係黎明楷同賴國強等。佢就可以多番啲時間，做更重要嘅嘢。
政府勾地一事，只見樓梯響，到𠵱家都未見有地被勾出。政府向傳媒講就話唔想賤賣，私底下就怨發展商出手低；發展商就認為，政府定價太高，好難接受，搞到佢哋成日空手而回。
咁究竟政府個價係點？蘭西道聽塗說咁聽到，加列山道山頂樓塊地，底價樓面每呎要萬二、三蚊，九龍塘義德道地皮就要三、四千蚊一呎，至於香港仔地皮每呎都話要成三千蚊。今次官商之間，似乎冇以前咁合拍。
蘭西得知，原來地政署設有特別小組，負責估價，凡有人入紙勾地，佢哋就估，完全獨立，亦好保密，甚至唔知邊個財團勾，只負責畀價，再由另一組人將估價同發展商個價相比，唔到價就唔批。
蘭西最近喺土地註冊處紀錄睇到，02年底到03年初，政府淨係租灣仔嘅循道衛理大廈、大生商業大廈、東城大廈，同埋胡忠大廈，月租已超過五十二萬，租期三年，總開支要成一千百八七十幾萬，都幾驚人！不過，呢批租約估計涉及樓面逾十一萬呎，每月呎租只係四個七，比市值平。
上述商廈都屬乙級，據講主要用作服務中心、後勤部門辦事處等。由此可見，政府都會唔係咁大花筒，冇係唔係都租甲級商廈，亂使納稅人錢。
另外，上個禮拜蘭西擺咗個烏龍，將銅鑼灣西武嘅相，當係金鐘西武，而香港區有兩間西武至真，多謝讀者指證。
政府不斷強調，樓市已經好轉，理據不外乎成交增加，負資產減少。利嘉閣研究部統計，個別屋苑銀主貨有缺盤情形，證明負資產少咗係真嘅。數據又顯示，銀主貨造價同市價，已經由一月份低百分之二至九，收窄到上個月嘅百分之二至五，即係話銀主盤筍貨已經買少見少。
利嘉閣何紹章分析，𠵱家銀行普遍都顯著提高銀主盤叫價，重有幾名買家爭奪，售價有乜辦法唔搶高吖？佢相信未來幾個月，銀主盤造價會更加貼市，甚至出現理想價。
蘭西
電郵地址：
