面係人哋畀，架就自己丟。掌管反歧視工作嘅何志平噚日出席同志議題報道獎頒獎禮，大會安排嘴啫啫嘅記協主席張炳玲同佢同台致辭。喺特區文革嘅火藥氣氛底下，張炳玲竟然膽粗粗咁問何同志應如何「愛國」。
局長今次收口唔再講孝順，反而學人拋書包，話「國」即係「家」，家係由人開始，然後就念咗句四書中《大學》嘅名句：「心正意誠，齊身立家，治國平天下。」聽落好似冇乜唔妥，不過就畀跟住上台致辭嘅名嘴黃毓民踢爆，《大學》正文應該係：「物格而後知至，知至而後意誠，意誠而後心正，心正而後身修，身修而後家齊，家齊而後國治，國治而後天下平。」係修身齊家，唔係齊身立家。今時今日嘅高官，讀書一知半解，咁又可以年薪四五百萬。
不過何局長好醒，喺毓民上台之前已經走咗。跟住輪到前廣播處長張敏儀就示範咗一個modelanswer：「愛國與否並不因為同志身份而有分別。」
傳真︰2623-9278
電郵︰