民主派呢輪四出呼籲多啲人登記做選民，以抗衡中國政府指使土共粗暴干預。人權監察噚日喺銅鑼灣擺檔，有余若薇、梁家傑、湯家驊同吳靄儀，市民反應自然熱烈。
前綫就係沙田叫咪，一方面籌款，一方面提青少年登記做選民，無他，擁護民建聯及工聯會嘅，絕大多數上晒年紀，有捐款人士一路入錢，一路細細聲同劉慧卿講，「我哋支持你，唔想聽啲人講廢話。」搞到卿姐笑得好開心。
講開選民登記，「民主女僕」余若薇同八方講，基本法四十五條關注組為咗鼓勵年輕人踴躍投票，決定設立一個大獎，俾介紹到最多朋友做選民嘅同學，獎品包括由各位大狀帶你參觀法庭、立法會，親身傳授盤問技巧，等你了解多啲本港司法程序等。
另外，當日向要求普選市民高舉中指嘅黃宜弘，佢喺議事堂嘅經典開會瞓覺look亦俾人印喺傳單上面，再配多句「取消功能組別選舉，我要做選民」嘅口號，睇到張傳單，大家都識得九月會點樣投票。
（圖）市民支持嘅說話令到劉慧卿好開心。
傳真︰2623-9278
電郵︰