無綫藝員部近日大執位，一向負責安排古天樂、郭羨妮同佘詩曼呢班一線小生花旦工作嘅蕭笑鳴（芭芭拉），近日俾無綫管理層調職，今後只負責管理一般合約藝員同配音組藝員事務，取代芭芭拉位置做古仔新經理人嘅，係前英皇電影部高層及前電影製片陳佩華。
古仔同芭芭拉在公在私一向關係非常密切，睇怕古仔拍完無綫六月嗰部新劇後，年底約滿後好大機會講byebye。無綫會唔會為咗挽留古仔，而畀番芭芭拉做古仔經理人？呢樣嘢真係講唔埋。
另外，無綫製作資源部助理總監陳灌明，近日同佢同部門嘅助理總監樂易玲嚟個職務大兜亂，陳灌明負責行政工作，樂易玲就掌管經理人部門，邊個得寵邊個失寵，大家心裏有數。
舒淇今個月底會去台灣宣傳佢主演嘅《見鬼2》，佢話拍呢套戲之前，睇咗李心潔做嘅第一集，有啲劇情都幾嚇人，到自己拍嗰陣，雖然又要搽血漿、又要被鬼跟，但係所拍嘅劇情一早知道，所以唔係好驚，不過拍嘅時候都覺得有啲毛骨悚然。
孫燕姿六月中將會喺內地舉行四場個人巡迴演唱會，有內地報道話當地主辦商紛紛拒接孫燕姿嘅演唱會，理由係佢人氣唔夠，驚蝕本。台灣華納唱片副總經理陳澤杉噚日話報道失實，佢話孫燕姿要舉行演唱會嘅消息一傳開，已經有十幾個城巿爭住搶人，𠵱家佢哋重揀緊喺邊度搞。又會咁得意，個傳聞竟然同個澄清版本嘅意思完全相反？
早排汪明荃（阿姐）向傳媒呻話俾無綫減騷，又話公司唔畀嘢佢做，原來係想向無綫施壓，等無綫嚟緊同佢傾約時對佢手下留情。其實阿姐重未傾約，佢以前一年簽成過百個騷，如果同阿姐續約，自然想安排多啲工作畀阿姐，可惜阿姐一向好難服侍，拍劇又嫌太辛苦，淨係想做主持，啲人咪唔敢搵佢做嘢囉！
噚日有報道話鍾淑慧日前公然拖住個男仔出街，馮仁昭打電話問番鍾淑慧呢單嘢時，佢話拖手單嘢真係得啖笑：「嗰個係我一個好朋友嚟㗎，當日我同班朋友同細妹一齊行街，大家有時玩得癲咗，你推吓我，我推吓你，好平常啫，根本冇拖住手咁誇張。」至於佢同老公吳岱融婚姻關係係咪亮紅燈，佢就話唔想多講喎。
