西班牙火車事件炸散咗歐美上周四股市，到周五，歐洲股市先跌後升，冇再踩多腳，美股更掂，杜指彈番三條一。今日港股，輪到好友報復。
新地（016）上周五仍跌2.4%，守穩70元，收70.75元，有機會成為反彈強勁成員，吼Call輪短炒，揀9118，隻輪5月到期，輪價80仙，溢價1.6%，槓桿率8.8倍。新地其他遠期Call輪，溢價講緊十幾個巴仙甚至超過二十個巴仙，咪亂買，個市若然再係唔對辦，呢啲高溢價Call輪會令到啲揸家輸得好慘。長實（001）亦係有反彈力嘅大藍籌，不過本周四派成績表，都係等睇完盤數後先至搵對象。
中移動（941）又係周四派成績表，彈出盤數前，股價若上升，暫時咪諗Call輪，驚住派完成績表後回落。若再跌，則可以諗吓Call輪，對象係9929，下月中夠鐘，輪價36仙，溢價0.8%，槓桿率6.9倍，數據唔錯。
中銀（2388）低位見支持，估計短期反覆向上，吼吓Call輪，對象係9218，9月到期，大把時間，輪價14.8仙，溢價3.8%，唔貴，槓桿率10倍唔低。
中石油（857）上周五收4.05元，進帳5仙，Call輪9343數據靚，用嚟炒未必啱，揸耐啲諗得過。隻輪年底至夠鐘，溢價得1.5%，槓桿率4.4倍。
章盛