上個星期港股大調整，跌勢全面，如果有股票唔跌，又或者倒升嘅話，通常都係有料到，其中一隻較多人留意，就係華德豐（297）。
其實關於華德豐嘅古仔，傳來傳去只得一個，就係市場憧憬剛成為大股東嘅中化香港，會將資產注入華德豐。
經紀陳話，華德豐走勢古怪，其實都唔係呢兩星期嘅事，隻股由舊年12月開始，喺唔夠0.10元水平炒上，最高見過0.46元。到今年2月初，中化香港落實行使認購權，向飛天朱購入股份，令持股量增至21.18%，但當中化成為華德豐最大股東後，華德豐股價竟然急回，最低見過0.28元，當時真係以為有人趁好消息出貨。
不過，上星期大市進一步急跌，華德豐不但頂得住，而且逆勢升番轉頭，上周五微升0.29%，收0.355元。坊間傳，中化落實向華德豐注入房地產業務。
中資買殼，通常都預咗佢哋有嘢放入去，但會否利好股價，就要睇吓注入乜嘢，同埋價錢如何。
慕容小初