班球員今屆都算當黑，除咗戴斯拿患抑鬱症要長唞外，薛基拿喺上周五一場熱身賽俾對手鏟斷隻啱啱好番嘅右腳，隨時要收山。
薛基拿喺舊年七月整斷咗右小腿脛骨，唞咗七個半月至好番；上周五佢代表拜仁預備組隊踢比賽，為復出準備；點知俾對手從後攔截，踢中啱啱好番嘅右腳，搞到被抬離隊，初步檢查後證實再骨折，極可能以後都踢唔番波。
呢位德國前鋒喺上月尾先三十歲，作為球員重好後生，加上本身質素唔錯，有頭槌有射術重有啲速度，如果提早收山，真係德國球壇損失。佢季尾會同拜仁約滿，聽聞拜仁唔打算同佢續約；𠵱家佢搞成咁，我求大俠希望拜仁攞啲人情味出嚟，喺佢約滿後繼續幫佢醫腳。
歐冠盃八強抽籤塵埃落定，唔少人都覺得九屆冠軍皇家馬德里對摩納哥，應該贏硬。或者皇馬本身都係咁諗，所以佢哋話同摩納哥較量時，准摩納哥派今屆由皇馬借用嘅前鋒摩連迪斯上陣。皇馬咁做，令我求大俠諗起英超紐記對老樸時，老樸嘅紐記借將路亞射破紐記嘅一幕……
講起皇馬，佢哋巴西前鋒朗拿度因為拉傷大腿肌肉，喺上星期五已經返咗里約熱內盧養傷。我求大俠就唔係好贊成皇馬咁做，因為巴西嘅醫療技術同設施唔見得比西班牙先進，而且「哨牙仔」喺國米時已經試過話返巴西養傷，其實去蒲去玩，結果搞到隻腳醫咗好耐先醫得番。
上個禮拜四喺足協盃作客些路迪半場時，因同對方龍門喺球員通道衝突而被逐嘅巴塞中場莫達，原來已經第四度做紅牌阿姑，令高層好唔高興，好有機會季尾被棄用。我求大俠認為佢本來係有料之人，點知特別躁火，連教練列卡特勸告都唔理，衰自己嘅話真係與人無尤。
NBA爵士隊教練史龍因老婆不幸患上胰腺癌，故今季不時都要缺席比賽照顧老婆，但季前被睇淡嘅爵士點知咁爭氣，居然可以處於爭奪季後賽行列（暫排西岸第九），咁樣本來係好事，但史龍𠵱家要兩頭兼顧，身心壓力真係好大，加上佢年紀亦唔細，真擔心佢撐唔到幾耐？