去完SneakerPimps波鞋展的VIP之夜，想寫下個人感想同場內一啲八到嘅嘢。
今次鞋騷主題比較偏向藝術性，主力玩街頭文化，並唔係限量版大晒冷。今次最弊係主辦機構經驗不足，加上本身係（滑）板仔，所以唔熟香港波鞋環境；令到波鞋展變成「（滑）板鞋展」，唔係咁啱香港波鞋氣候。布置方面亦有啲亂；部份特別版擺位唔夠「出」，好難吸引到人注意。
展出鞋款由超舊原版到最新的佐敦十九都有；亦有好多DIY鞋款，創意爆燈；作為香港首個具規模的波鞋騷，算不過不失！
VIP之夜其實做得唔錯，有音樂、有靚女、有啤酒；但係有極多人唔係為睇波鞋而來，純粹扮潮人吹吓水，飲免費酒或同班朋友聚吓，搞笑！
其間同一剔牌美豔高層傾偈，冇乜料爆，提到美國已推出的佐敦十九，香港就應該唔會喺三月有售；重有「白燈」展覽香港亦冇份，我諗炒鞋友都幾失望，因為代表又少對「香港燈」炒。
亦都要講句對唔住，原本小弟網站的展台開波前幾小時臨時取消，有好多因素亦無謂再提，一句講晒道不同不相為謀，絕對和平分手。