細細個讀書都聽過，維多利亞港水深港闊，東有鯉魚門，西有汲水門，鯉魚門除咗夠深之外，重有無值得一遊嘅景點？有！今日就帶你暢遊一間傳聞由海盜興建嘅天后宮，再睇「街渡石」，尾程走訪拍戲取景熱點荒廢石礦場，全程1小時。所以話嚟鯉魚門，唔一定係食海鮮嘅……
記者：陳震霖 攝影：梁細權
模特兒：Ruby、珊（Space2）
穿過大大小小海鮮酒家，10分鐘步程後見一小石灘，灘前1塊平整大石，上面噴住恭賀神舟五號升空嘅搞笑字句：「神舟五號的成就，全球華人的驕傲自豪智慧」，紅漆字白綑邊，字字工整，都唔知邊位鯉魚門塗鴉高手噴上去……唉！其實使乜鬼定義何謂「愛國」？計我話就人人都愛國，表達方法唔同咁解啫。
石灘盡頭有堆延伸入海嘅巨石，石上嗰座好搶眼嘅灰色燈塔，老早成為鯉魚門標誌，因為鯉魚門位於維多利亞港以東，係香港海上交通重要出入口，入夜燈塔放光，已為來往船隻導航超過50年。傍晚，好多人都鍾意嚟燈塔吹海風，眺望筲箕灣，近睇維多利亞港，個View靚到你唔信。
鯉魚門位於油塘工業區東南面，對岸係筲箕灣亞公岩，有安里西村、馬環村、馬背村同輋頂村4條超過150年歷史嘅古村，人口接近5,000人。以往村民大部份係漁夫、農夫同礦工，直至60年代，漁農礦三業式微，三家村避風塘慢慢演變成𠵱家嘅海鮮食肆集中地，大街兩旁依然保留矮矮嘅民房，鄉下漁村風味極濃。
《短線遊》介紹過唔少天后廟，不過鯉魚門天后宮就零舍與眾不同，點解？因為呢間天后宮唔係由鯉魚門村民自發興建，反而由海盜鄭連昌於乾隆18年（1753年）建成。點解咁肯定？因為喺1953年重修時發現1塊石碑，上面記載住：「天后廟，鄭連昌立廟，日後子孫管業，乾隆十八年春立。」廟前有2支大炮，睇嚟呢間真係賊竇天后宮。
翻查歷史，鄭連昌係明朝延平郡王鄭成功部將鄭建個孫，活躍於鯉魚門一帶，除祇奉天后外，佢重吩咐兄弟長駐天后宮監視四周船隻，以防官兵來襲。道聽塗說，當年鄭連昌選鯉魚門後面大山作巢穴，當時村民稱之為「惡魔山」，叫吓叫吓變成𠵱家嘅「魔鬼山」。
繞個圈，走去天后宮後面岸邊，眼前出現唔少奇形怪狀嘅巨石，最出位係「街渡石」，有船身有簷篷，橫睇似隻擱淺嘅街渡，上有紅字「海角潮音」，斷估喺度聽浪一流；「腳板石」似隻擘開腳趾嘅大腳板，身手好可以攀上石頂；「騎樓石」，用嚟避雨就至啱；最後係「人面石」，半邊臉載浮載沉，伸出舌頭，死不瞑目咁款，好恐怖。
入村，向東行，穿過幾間村屋，10分鐘去到荒廢石礦場。40年代，鯉魚門採礦業非常興盛，𠵱家採礦業鯉魚門老村民都曾經做過礦工。究竟點樣採礦？某老村民話：「我哋先用火藥炸開巨型大石，然後用人手打成碎石，我哋喺海邊起咗個碼頭，方便大躉船泊岸將碎石運走。」今時今日，石礦場已經荒廢，可能人亦罕至，唔少電視同電影都好鍾意嚟呢度取景。
入鯉魚門唔一定食海鮮，村入面有唔少售賣傳統餅食嘅舖頭，其中「勝園餅食」開業30幾年，老闆娘馬太，每日自製雞仔餅（5件$10）同琥珀合桃（每盒$20），全部落足料，好味到唔停得口。
勝園餅食（23482215）
地址：鯉魚門海旁道中27號A地下。
去程：觀塘裕民坊巴士總站乘14C巴士（$3.5），鯉魚門崇信街下車。
回程：鯉魚門崇信街乘14C巴士，回裕民坊巴士總站。
