電視台有位女藝員外表純情，成個乖乖女咁，但實際上好花心，佢本身已經有個圈外男朋友，但早排搭上咗有錢家族嘅富家子，而富家子又有個拍拖幾年嘅有錢女友喎，呢段四角戀都真係夠晒錯綜複雜。
女藝員同富家子搭上，當然係鍾意對方有錢，但富家子就純粹貪新鮮，因為佢絕對唔會為一棵樹放棄成個森林，況且富家子嘅屋企人好着重門當戶對，咁又點會贊成佢哋兩個一齊呀？所以富家子一直都係一腳踏兩船，之前重有人當街見到佢同女藝員喺架車入面狂咀㖭。
不過女藝員亦都蠢唔晒，佢自知要釣金龜婿唔係咁容易，所以亦瞞住富家子，同一個男仔拍拖，馮仁昭聽聞個男仔嘅屋企係小康之家，出身都OK嘅，只係女藝員自己心頭高，恨入大富之家多啲啫！
Cookies噚日去咗沙田為一個慈善活動做宣傳，Stephy話佢啱啱學車，問佢會唔會喺考牌時着得性感啲博考官好感，佢就話要以實力取勝喎！而同樣想學車嘅Miki，就話生肖運程話佢今年有血光之災，連坐車都擔心，所以唔諗學車住喎！計我馮仁昭話，揸車最緊要小心同專心啫！
梅艷芳阿媽日前同人講，話返阿梅舊居時俾大廈保安阻止，但其他人就可以喺阿梅故居出出入入。點知話口未完，噚日阿梅助手王敏慧竟然攞住打西餅喺梅媽跑馬地屋企徘徊，大家估計佢可能想探梅媽，但梅媽咁啱又出去同人飲茶，所以搞到摸門釘啦，佢兩個真係冇緣喇！
薛凱琪所屬嘅華納唱片公司，近日裁減百分之二十嘅人手，薛凱琪以後會幫公司慳多啲錢，佢話：「我唔緊張，因為冇影響歌手，亦唔會cut宣傳費，以後我會幫公司慳錢，化妝盡量自己化，我亦會自我增值，學埋set頭同揸車，咁公司有新人嘅話，我亦可以幫佢哋化妝、set頭，做一個全面嘅藝人。」
正喺內地拍攝電視劇《風雲II》嘅內地女星黃奕，早幾日開工時因為天雨路滑，兼且地上面嘅石頭高低不平，佢一個唔小心仆親，要跛吓跛吓咁返酒店。原本只係撞傷膝頭，對腳瘀晒，不過，件事傳傳吓竟然傳到話黃奕跌斷雙腳，你都咪話唔誇張。
葉蒨文日前喺台灣接受名主持張清芳訪問，佢自爆喺拍戲或者錄影之前，如果冇劇本睇，就會全程黑晒面，又話自己性格好直，唔明點解咁都會識到一班好朋友，佢重話自己拍戲唱歌都成日執二攤，不過林青霞唔拍嘅戲，佢就拍得紅，齊豫唔要唱嘅歌，佢又唱得紅。馮仁昭覺得葉蒨文其實都幾醒㗎，明踩自己，其實暗讚。
有周刊報道話林文龍同郭可盈嘅身家相差懸殊，結婚時文龍又唔使畀禮金，噚日郭可盈同林文龍回應話覺得呢啲報道好可悲，將正面嘅嘢變為負面，不過佢哋唔會因為咁而嬲，反而會祝福呢本周刊，幫本書祈禱，佢哋話結婚受到好多人嘅祝福，唔明點解有咁嘅報道。
