大市整體走勢真係差勁，市場除咗賴係「秋官效應」之外，最重要可能係因為恐怖襲擊再現，淡友又有機會喺上周五再下一城。不過伏勝認為，只有喺兵荒馬亂嘅時候，散戶先會有機會去撈好嘢，就好似隻恒生（011）咁，雖然早前同滙控（005）聯手拖低個市，但係上星期反而表現硬淨，尤其喺跌至100蚊樓下時，更加買盤如雲，可能係班淡友知道踩低恒生要出多好多力，不如搵第二隻股嚟開刀。有做基金嘅朋友講，恒生息率一向咁好，即使星期一除息，仍然好吸引，不妨趁低位買番啲嚟坐吓。
上星期最矚目嘅股票就係東方燃氣（432），皆因小小超又發揮佢點石成金嘅本領，令到一隻無論喺成交量抑或盈利能力都平平嘅殼股，一變就成為咗電盈（008）嘅地產旗艦。
不過呢個市場永遠都會有喜有悲，喜嘅當然係嗰批原本已經持有嘅大戶，可以用最高1.9元沽出；悲嘅就係誤以為電盈會用1.8元入股，而喺高位1.9元接貨嘅散戶。直至上周五收市，隻股只係得番0.67元，高位追貨者計落唔見咗六成半。
伏勝有朋友八到佢哋將會幫東燃改番個靚名，嚟反映電盈同佢嘅親密關係，不過為咗唔好令人誤會佢同電訊有關，可能會用番盈科呢個名，即是分分鐘會叫盈科地產。伏勝一聽到個名就即刻周身唔自在，因為盈科地產同「仍Fall地產」個名一樣，聽到都令人心寒。不過間公司改乜名都好，今次小小超喺收購東燃呢單刁，可以話係盈動（當年嘅1186）神話後另一個紀錄，不過今次係新上車嘅股東輸錢輸得最快嘅紀錄。
伏勝