老董日日夜夜話愛國，但係民主派立法會議員何秀蘭就好唔滿意佢嘅表現，認為佢有失職之嫌。
何秀蘭話，老董作為香港特首，係中港橋樑，有責任協助增加兩地了解，好似溫家寶總理嘅工作報告，隻字不提香港政改，老董係咪冇同佢講呢？
另外，立法會議員都應該熟讀溫總報告，以增進對中央政策嘅認識，咁特首係咪都有義務返嚟同啲議員滙報吓，至少都派份報告畀大家，或者上網，唔使啲議員要靠晒電視個幾分鐘報道。
八方聽聞，阿Cyd（何秀蘭洋名）已經寫咗封信畀老董，反映不滿。
自從土共瘋狂大反擊，搞文革式批鬥之後，好多民主派人士嘅心情都唔好，梗係啦，唔夠人選就出大佬，喊打喊殺，重有乜好玩。阿Cyd話，佢都有啲唔開心，但係佢同被梁振英纏住不放嘅卿姐講，𠵱家最緊要沉得住氣。正所謂小不忍則亂大謀，八方都勸民主派千祈唔好自亂陣腳。
傳真︰2623-9278
電郵︰