關心妍（Jade）早前把日本學藝的片段交給有線播放，結果觸怒無綫，遭全面封殺，據悉今年六月舉行的無綫《勁歌金曲》季選，她已篤定無緣捧獎。陷入如斯困境的Jade，只好黯然執包袱避走美國，不過她自言不會被人睇死，對前景仍信心十足。
出道兩年的關心妍，上月假紅館舉行了兩場處女演唱會，入座率不俗，但Jade所屬的BMA唱片公司將她早前在日本學藝的片段，交予有線播出，無綫得悉後大為震怒，下令全面封殺Jade，為期暫定三個月，其間她除了被禁止亮相無綫所有節目外，MV亦全線被抽起，甚至有消息指六月舉行的《勁歌金曲》季選上，Jade已被飛出局，無緣問鼎任何獎項。
Jade被無綫雪藏已是無可挽回的事實，據悉她在日內將前往美國暫避鋒頭，逗留約一個月，而她亦會順道在當地跟隨一名外籍黑人女教師學唱歌。日前Jade在天后接受本報記者訪問，她說：「其實我一早計劃去美國學唱歌，點知又咁啱發生咗呢件事，啲人要諗我係避鋒頭嘅話都冇辦法，況且嗰件事始終係自己唔啱，就算我留喺香港都冇辦法喺電視曝光，不如趁機深造吓，我諗四月至返嚟。」
傳聞Jade被《勁歌金曲》季選飛出局，她無奈地說：「我都知入季選比較艱難，但冇辦法，都要面對，希望遲吓可以追得番啦。」Jade坦承封殺事件為她帶來不小打擊，她歎道：「我未發生過啲咁嘅事，唔識點處理。平日我做嘢已經好小心，呢次之後，做嘢就更加要小心，發生一件事真係可以令你前途盡毀。」BMA唱片公司提供Jade日本學藝的宣傳片給有線播放，原本是希望替Jade的個唱造勢，回想起來，Jade的演唱會由頭到尾都是在一片是非聲中舉行，但Jade輕鬆的說：「啲人成日話我演唱會送飛，送飛都可以唔嚟㗎。之前重有人寫我啲碟唔賣得，港台就畀番個清白我，公布我全年銷量第四。我知係會有人做啲嘢阻礙你、整跌你，我唔會就咁俾人睇死。我記得開演唱會企上台時，從未感受過有咁多人，嗰我真係好感動。」
Jade續道：「我唔係大口氣，我唔踩人，又好努力做好自己嘅嘢，又唔係蒲精，重要做一瓣，只係唱歌，當然有啲人都會唔鍾意我，硬係要踩多腳，但咁樣只會令我嘅生命力更頑強。」
對於有報道指Jade的母親包起女兒個唱門票，Jade即抱不平說：「我唔想牽連佢，之前有好多報道，講到我媽咪乜都搞得掂，好似女俠咁，如果媽咪咁把炮，我就唔使等咁多年至等到機會啦。媽咪唔係圈中人，冇必要承受咁多壓力，對佢好唔公平，但媽咪重要掉番轉頭安慰我。佢只係一個普通媽咪，唔係想像中咁犀利㗎。」
今次Jade舉行了兩場個唱，滿以為她應有一點歌酬落袋，殊不知她理直氣壯地說：「係零蚊，冇歌酬出。賣晒啲飛，扣番成本，公司只係打番個和賺少少，去日本學藝、請隊band嚟香港、燈光音響搭舞台都係日本送過嚟嘅，開三、四場就賺錢啦，但公司都肯咁落本幫我開演唱會，所以我成個過程都好enjoy。開演唱會達成咗自己嘅一個夢想，有得企上紅館已經好開心啦。」
