羅大佑前晚在紅館舉行個唱，他與葉德嫻早年因《赤子》一曲不和，前晚羅大佑表示葉德嫻會於昨晚捧場，但昨早葉德嫻已稱不會出現，並聲言至今仍然為《赤子》事件而感生氣。
羅大佑前晚在紅館舉行「搞搞真意思演唱會」首場演出，早年羅大佑把葉德嫻的《赤子》試唱版本灌錄成碟，想不到至今十多年，葉德嫻仍為此生氣，但羅大佑可能並不自知。他前晚邀請黃耀明在台上獻唱該曲，完騷後接受訪問時，仍表示葉德嫻會欣賞其尾場演出。但葉德嫻昨日出席活動否認說：「我唔去㗎，紅館會噴煙，我受唔住，聞到煙就敏感唔舒服。」
葉德嫻表示並非因《赤子》一事不去捧場，提到羅大佑曾表示要送ＣＤ機向她賠罪，她說：「好多年前佢託林夕送咗部手提ＤＶＤ機畀我，重有張便條話因為《赤子》件事唔好意思，部機同便條都重喺度。」
葉德嫻表示甚開心《赤子》大受歡迎，問她還生不生氣，葉德嫻說：「我鍾意嬲佢呀，亦希望自己可以嬲，要嚟警惕自己，係個教訓，我呢啲大情大性嘅人，唔想再俾人呃。」若與羅大佑見面會否傾偈，葉德嫻說：「冇問題，好耐之前有個蘇聯鋼琴家嚟表演，我買唔到飛，佢都請我睇。」
此外，羅大佑亦有在前晚演出悼念梅艷芳，他說：「梅艷芳好珍惜佢嘅演藝人生，死都要死喺舞台，可以代表香港精神，我喺香港、台灣同中國都冇遇過個咁嘅人，佢重喺度㗎。」然後羅大佑還故意說：「阿梅準備好未呀？」現場播放梅艷芳清唱《似是故人來》的聲帶，羅大佑伴奏，螢光幕只播出歌詞。
採訪：王連連
攝影：陳偉權
