財爺Henry唐噚日大打「親民牌」，親赴尖沙嘴文化中心露天廣場，出席有線主辦嘅戶外節目，想聽吓普羅大眾嘅心聲，但係唔知乜解究，噚日場面異常冷清，只係得幾十人「撐場」，而且唔少出席者重係由有線邀請，好似佘繼標同蔡耀昌等，不過咁嘅場合，當然唔少得「中環洪金寶」呢個不請自來嘅嘉賓，佢老哥真係好識走位，成日企喺唐司長身後面，郁都唔郁，呢招博上鏡真係出神入化。
八方見到場內得嗰小貓三幾隻，於是就到場外打個圈，點知就撞到一名來自江西嘅自由行旅客，佢同八方講好羨慕香港同胞可以當面質詢政府官員：「我都見過溫家寶，但係就只准睇，唔准問」，睇嚟香港人真係要好好珍惜呢啲權利。
其實，雖然唔少出席者都不滿財爺無回應市民嘅問題，但都有人讚佢態度誠懇，其中兩名中大學生會候選人就話希望第日董特首都可以出席呢類公開論壇，接受市民質詢政改嘅問題。
講番Henry唐，佢老兄真係幾識做，節目完咗之後，即刻落去同市民握手打交道，重抱住個小朋友影相，一副慈父表現，小朋友叫做Ken仔，四歲大，八方之後問佢識唔識財爺，佢就耍手兼擰頭。
另外，大前晚唐媽媽唐尤淑圻喺婦協活動時大呷寶貝仔埋首財政預算案，忙到連周日嘅familyday活動都唔出現。點知財爺佢噚日就帶埋太座去沙田馬場睇跑馬，八方將佢媽咪嘅牢騷講過佢知，財爺即刻一諾千金，話今日familyday一定陪媽咪食番餐飯。嗱，唐媽媽，收到未呀？
傳真︰2623-9278
電郵︰