英國冠軍騎師范義龍，騎功蓋世，幾年前曾一度威震香江，但之後再來表現就好一般。最近佢在英國犯下天條，涉嫌造馬，重造得手法極劣㖭，一代英雄，如此收場，令人慨歎。
跑馬唔係跑人，古有明訓，但人為因素亦可令好馬由贏變輸，好彩香港賽馬監管之嚴，世界上數一數二，馬迷唔好以為喺香港造馬好容易。近來聽電台、睇馬經，好多馬評人慨歎賭馬難，跟住鬧埋賽事編排，投注額下跌，有幸災樂禍嘅感覺。其實大家食呢行飯，如果賽馬失色，馬迷流失，投注額大跌，馬經冇人睇，啲評馬人、馬經記者編輯冇得撈，印刷廠都少咗好多生意，志願慈善機構社工亦要減薪，甚至失業。評馬人基於專業原則，有啲賽事係可以批評嘅，但係乜都鬧，甚至幫埋泥地賽事，就有啲過份。如果我係馬主，我隻馬係泥地專家，你馬會唔編排泥地賽事，我隻馬點贏呀？𠵱家一日賽事中，泥地賽兩場起、三場止，基本上已照顧各方利益平衡啦，重有乜好鬧？
星期三睇《新報》，資深評馬人匡公（匡公睇馬）有云：「……從未見叔叔（匡公）筆下嘆賭馬難，乜嘢原因？真係話長紙短，只係解釋，任何玩意遊戲，何必認真，只要自己接納，無須好似考學位……買一百幾十，戲飛一張，當作娛樂費，人家騎上馬背攞命搏，我哋評馬則眼睇為實……試問世間上，邊有博彩容易贏錢好生涯？仲使有人打工做生意？」匡公前輩果然睇得通透，啲後輩學嘢啦，咪噏得出就噏。