台灣大選進行得如火如荼，國民黨今日下晝會舉行超級星期六嘅「反扁大遊行」，但連宋今早就算幾忙，都要抽身出席中華旅行社前總經理黎昌意嘅遺體告別儀式。
九十年代初黎昌意派駐香港三年幾，由於佢長袖善舞，好快就打通中港台之間政經界人士嘅經脈，為港人接受，台商歡迎。
黎昌意打開香港嘅局面，當然同佢嘅出身背景好有關係，佢老竇黎玉璽將軍係國民政府當年海軍首位四星上將，出任過參謀總長，黎昌意後生都想過學武，但黎母不准，所以去咗史丹福讀企業管理，後來加入政府。
黎昌意新正頭心臟病發不治，終年六十四歲。治喪委員會由連戰當主任、副主任包括宋楚瑜、馬英九等二十六人。
八方聽聞，本港商界都準備係月底為黎先生開追思會，葉國華係其中一個牽頭人。又民主黨同立法會議員觀摩台灣總統大選團已相繼抵台，唔知劉千石會唔會順道去向黎先生鞠個躬？
傳真︰2623-9278
電郵︰