早排有線娛樂新聞台女主播梁嘉琪，瞞住公司兼曠工兩日，去咗參加寰宇劇集《伙頭智多星》嘅女主角招募，結果佢重贏咗冠軍，但係因為佢同有線有經理人合約在先，唔可以私自接嘢做，所以有線就發咗封律師信畀佢，要求佢畀個合理解釋。不過就有人爆料畀馮仁昭知，梁嘉琪唔單止唔肯解釋，啲態度重好鬼囂張，好似嬲咗成班同事咁喎！
有線𠵱家暫時唔畀梁嘉琪出鏡作為懲罰，叫佢做住幕後寫稿同埋錄吓音，但係梁嘉琪就好唔合作，同上司講話唔識寫稿，等到夠鐘收工重即刻鬆人㖭。梁嘉琪啲咁嘅態度，擺到明係博炒，等佢順理成章可以去拍劇做女主角，梁嘉琪之所以企到咁硬，有線覺得係有人喺後面撐腰同埋教唆。
對於呢件事，有線嘅態度好強硬，因為件事已經升級至由法律部門去處理，如果個個主播好似梁嘉琪咁自把自為，咁重成世界嘅？馮仁昭覺得梁嘉琪好短視囉，佢同有線簽咗幾年合約，人哋又點會唔捧佢吖？都唔知幾多喺出邊浮游嘅藝人想簽電視台都冇人吼，希望佢哋可以大事化小啦！
鄭少秋與張可頤噚日喺將軍澳電視廣播城拍攝無綫新劇《楚漢驕雄》。張可頤話同秋官合作好開心，對於自己經常俾人影到佢同男性朋友約會，張可頤話：「我𠵱家都冇時間出街喇，搞到我都唔敢約朋友，每日出街都會好驚。」
《全美偶像大選──終極蝦碌版》將會喺下個星期三喺衛視合家歡台播出，到時大家可以睇睇，孔慶翔點樣憑佢嘅造型同埋歌藝出晒位，同埋見識吓孔慶翔任人揶揄都唔發脾氣，
噚日地產界傳出話周星馳以四千三百萬，賣咗旺角先達廣場嘅兩個舖位，呢兩個舖位係前年十月以三千萬買入嘅，年半就賺咗成千三萬，都幾和味喎！呢兩間舖嘅持有人，係周星馳或相關人士，不過記者打電話問星爺係咪有件咁嘅事，佢又唔肯認喎。
徐楓噚日同佢新簽嘅女藝人關之彤喺台灣亮相，徐楓話覺得關之彤有鄰家女孩嘅氣質，台灣人會好受落，問到徐楓佢好友王祖賢最近嘅情況，佢話張國榮過身呢件事，令到王祖賢有輕微抑鬱症，雖然已經冇事，不過因為最近重推咗好多工作，損失咗六七百萬港紙。
