離開樂壇十二年的歌神許冠傑，將於六月復出於紅館舉行個唱。阿Sam復出後首隻親自作曲填詞及主唱的新歌《繼續微笑》，乃是他有見去年發生沙士、7.1大遊行和張國榮及梅艷芳逝世等種種不快事，有感而發寫出來的心聲，藉機會鼓勵香港人忘卻憂傷，繼續歡笑。
九二年退出樂壇的「歌神」許冠傑（Sam），即將於六月復出，並在紅館舉行個唱。據舉辦阿Sam今次個唱的恒藝亞洲負責人丘亞葵表示，阿Sam今次重出江湖的目的，無非是忘卻煩憂，繼續微笑，就如其復出後首隻親自作曲作詞及主唱的新歌《繼續微笑》一樣。
雖然阿Sam較早前已填寫了《04祝福你》一曲，並與楊千嬅和梁詠琪等一班後輩歌手合唱，但他在該首歌只是客串形式唱了一句，而《繼續微笑》才是阿Sam復出的首支新歌。在《繼續微笑》歌詞中，阿Sam提到「微妙人生，沒有大不了，處身虎穴也輕笑，您會發覺重要事原是渺小……」他明顯地希望憑歌寄意，鼓勵香港人拋卻煩憂，開開心心迎接每一天。
丘亞葵昨在電話中轉述阿Sam心聲說：「佢覺得香港人近年好攰好辛苦，好多時好似鬱住鬱住咁，尤其是舊年發生咗好多唔開心嘅事，好似7.1大遊行、張國榮、梅艷芳、柯受良同林振強先後離世，沙士又搞到香港雞毛鴨血。阿Sam話自己同香港係一齊成長，所謂生於斯長於斯，佢同香港係憂患與共，佢自己都好唔開心，好大感慨，所以間唔中都喺屋企唱番自己啲舊作嚟抒發一吓。」
阿Sam當年首本名曲，正是社會生活的一個反映，阿Sam認為他的舊作既可讓自己抒發情懷，理應可以讓香港人忘憂，故阿Sam在個唱將演繹舊作為主。
丘亞葵說：「《半斤八両》係講打工仔嘅心聲，而《打雀英雄傳》，阿Sam話香港人可以好似呢首歌咁，得閒打吓麻雀嚟輕鬆吓，又或者好似《天才白痴夢》歌詞『南柯尋夢』咁，將所有唔開心嘅事當係發咗場夢咁忘記佢。」
丘亞葵續說：「阿Sam希望鼓勵香港人進取啲，唔好咁戾氣，香港前景其實都唔係咁差嘅啫。𠵱家我哋希望可以喺六月舉行個唱，場數未定，阿Sam話希望畀香港人一個開心嘅晚上，到時佢會同大家講吓佢呢幾年嘅心聲，同埋十二年退休生活。阿Sam又話佢知道好多歌迷都好關心佢S
此外，阿Sam《04祝福你》MV早前已完成製作，並於日內推出，據知阿Sam除粉墨登場外，更將去年發生的大事照片加插在MV中，包括沙士肆虐香港及張國榮離世等。另外，原定許氏三兄弟與周敏慧於六月開拍新片，但因製作上出現問題而延期開拍。
採訪：戴彩煥
