馬德里發生火車連環大爆炸，嚇到阿虎都怕怕，對九鐵與地鐵（066）亦有心理陰影，噚日轉咗搭巴士返工。
港股早段急挫近300點，低見12730水平，地鐵曾跌2%，廣深鐵路（525）更一度急跌4.25%。地鐵與廣深鐵路股價下跌，應該與恐怖襲擊事件冇關，唔通阿蓋達會花彈藥襲擊中港？
黑客話，地鐵主要係跟住大市跌，而廣深鐵跌因為有芬佬洗倉。投資者後尾見美國場外期指反彈，而今次恐怖襲擊事件亦冇911咁震撼，大市跌幅收窄至91點，收報12932，地鐵亦平收12.15元。
美股過去幾日跌近500點，恒指由月初至今更跌近1000點，大戶正好趁恐怖襲擊，於低位平淡倉食胡，所以港股噚日跌幅收窄。
國企指數走勢反覆得誇張，先挫213點，然後倒升79點。無他，歐洲芬佬未瞓醒就係咁沽貨，後尾發現江銅（358）同重鋼（1053）業績正到暈，去年盈利均以倍計增長，斷估其他國企業績都唔會太差，加上油價有利石油化工股，搞到先前減磅嘅芬佬，真係補倉都補唔切。
近排不但超人系嘅金手指效應失靈，連VP嘅金手指亦難以發揮作用。新海能源（342）先舊後新配6億股，每股作價0.145元，較停牌前報價折讓7%，其中1.152億股由VP認購，增持至逾10%。
不過，市場無視VP增持好消息，唔少承配人即刻沽貨，賺少少差價就鬆人，搞到股價一度跌破配售價，低見0.138元，好彩最後以0.148元收市，不致破底收場。
阿虎