壞消息一擔擔，恒指最傷嗰陣蒸發咗近300點，埋單只係唔見91點，好友輸少當贏。
新世界Call輪9297，係少數有得升而打入10大（且名列第5）嘅Call輪，收1.55元，升36%，不過成交額得71萬份。隻輪升，係因為正股（017）上升帶動，正股由7.25元升上7.45元。隻輪重有唔夠3個月壽命，溢價11.2%，槓桿率5.3倍，數據唔得吸引。其次，新世界供股，供股權本月24日掛牌，好可能供股權掛牌之後，正股跌多過升，啲股東仔會賣部份股份攞錢去供股，或賣供股權令供股權跌價拖低正股。
33隻恒指成份股中，9隻有得升，德昌（179）係其中之一，收8.65元，進帳15仙。有兩隻德昌輪，升幅同跌幅都喺榜上排名第2，咪以為1隻係Call，1隻係Put，兩隻都係Call。
德昌Call輪9154係標準輪，收3.4仙，彈升55%，6月到期，溢價31%，槓桿率25.4倍。去到尾，冇得剩機會大過有得剩。
德昌Call輪9700收14.8仙，大散46%。呢件8月到期，溢價26.9%，槓桿率5.8倍，係表面數字，因為係「窗口定界輪」，啲實際數據好難計。睇唔掂嘅嘢，最好咪搞，9700又的確冇乜人搞佢，昨日成得21萬份，價值兩皮七，而在此之前出爐僅11日，除咗首日有5萬份（值皮半嘢）易手之外，其他日子成交一片白濛濛。呢啲咁高深嘅××輪，唔識冇蝕底。
章盛