房屋及規劃地政局局長孫明揚舊年底公布深化樓市措施前，曾經喺一個午餐會中俾人問佢個樓市重係咁差，幾時先會好。孫公嗰陣答話樓市已經去到隧道盡頭，𠵱家已經見到曙光；噚日佢同成班行家食飯，記者又係問佢樓市，但邊個官講親樓市都實俾人鬧，佢死都唔肯再評論，只係話𠵱家已經出咗隧道。
肖猴嘅孫明揚今年同曾蔭權一樣犯太歲，年初八方同行問佢猴年有何大計時，佢曾經講過話希望官非遠離他，不過中環填海官司啱啱先有定案，公屋租金官司就排咗喺下月二十日再審，睇嚟孫公重係有排唔得閒，重要繼續同官非打交道。不過，愛護孫公嘅一概人等已經送咗三樣吉祥物畀佢趨吉避凶。
當中當然包括佢太太，孫太早前送咗一個小金器、一個小銀器同一個小玉器畀老公，全部都係化解流年犯太歲嘅吉祥物，孫公亦珍而重之咁將佢哋分別放喺三個膠袋仔（好似睇醫生裝藥嗰啲袋）入面，然後放入銀包隨身攜帶。
傳真︰2623-9278
電郵︰