四歲內地血癌病童偉仔，日前再度來港接受化療，經過多月治療，情況已逐漸穩定下來，惟距離完全康復仍有一段日子。由於偉仔並非香港居民，未能享用本港醫療福利，蘋果日報慈善基金月前為他籌集捐款，在各界踴躍捐輸下，共籌得逾十八萬元，偉仔雙親為此感激不已。
農曆新年過後，偉仔經已隨父母返回內地休養，日前再由深圳到港，入院注射「背脊針」（醫學名為鞘注，屬其中一種化療注射方法）。「呢隻針藥係由背脊打入去，化療藥水會經脊髓液循環到腦部，打針嘅過程都幾辛苦，所以囝囝好驚，噚晚佢成晚扭計，話唔想入醫院。」偉仔母親黃太說。
平日精靈活潑的偉仔，入院前一反常態，只見眉頭深鎖的他，不發一言，經常伏在父親的肩膀上。黃父憂心忡忡地謂：「希望佢今次啲反應冇咁犀利啦，因為有時打完化療針之後，佢會嘔得好厲害，口仔又爛晒食唔到嘢。」
去年三月，偉仔因為面色泛黃，發燒持續不退，被雙親帶到當地醫院求診，經反覆檢查後，於去年五月被證實患上急性淋巴白血病（俗稱血癌），並即時在內地接受了四星期化療。
本身為香港人的黃父，去年六月帶同偉仔及妻子來港求醫，而偉仔經過香港醫生近九個月的悉心醫治後，病情漸趨穩定。「最近偉仔嘅白血球都幾正常，𠵱家佢轉咗食口服抗癌藥，只係每隔十星期要入院打一次『背脊針』。睇見囝囝有好轉，我同太太都冇咁擔心，不過，計時炸彈一日未解除，我哋始終好難輕鬆。」事實上，偉仔至少仍要接受一年抗癌療程，而五年內沒有復發，才算真正康復。
偉仔抗癌歲月漫長，醫療費亦不菲。由於他並非香港居民，未能享受本港醫療福利。「𠵱家囝囝每兩個星期覆一次診，每次都要畀七百蚊，入院就重貴，每日收三千三百蚊，咁大筆錢，我哋真係負擔唔到。」
黃父原本任職司機，因要中、港兩邊走照顧兒子，被迫辭去工作，現一家人的生活費要靠親友接濟，無力應付一筆龐大的醫療開支。偉仔過去大半年的住院費已獲醫院豁免，現時離院後所有覆診及藥物費用則須自行承擔。
蘋果日報慈善基金有見黃家苦況，月前曾撥款五千元助他們解決燃眉之急，並且透過公開呼籲，替偉仔籌集醫療費。報道刊登後，短短兩個月內，已籌得合共十八萬三千一百九十七元，蘋果基金將會代為監管此筆善款，直至偉仔完成所有醫療項目為止。
「我哋真係好感激各位善長人翁，多謝你哋咁愛錫偉仔，我哋代表囝囝祝福大家身體健康。」偉仔雙親再三致謝。
捐款編號：C1255
暖流熱線
電話:29908688
傳真:23702192
電郵:
網址：