有唔少影迷都鍾意睇以戰爭為題材嘅電影或電視劇，繼《雷霆救兵》同《雷霆傘兵》之後，最近又出現一套叫《雷霆喪兵》嘅戰爭片，主角係喺《帝國驕雄》度做奸仔嘅祖昆馮力士（JoaquinPhoenix），而且成套戲玩得好喪。
《雷霆喪兵》得到英國電影雜誌《Empire》喻為最潮、最尖銳同最幽默嘅戰爭片之一，導演以黑色幽默嘅手法揭露一班美國駐軍點樣因「和平」而出事。祖昆馮力士喺片中飾演身懷搵錢絕技嘅蠱惑軍人，喺軍營建立佢嘅搵錢王國，唔止從公費掠油水、買賣黑市軍火，甚至喺軍營幽暗角落提煉海洛英。
祖昆亦係情場聖手，佢唔單止送頂綠帽畀上司，為咗自保更不惜接近新上任嘅軍長個女。導演強調呢套由美國同名小說《BuffaloSoldiers》改編嘅電影，裏面嘅情節並非憑空杜撰，原作者曾經好認真咁搜集資料，並從美軍得到可靠資料，可以話係喪得有根有據！