剛剛推出以日本歷史做題材嘅《戰國無雙》都未過氣，新一輪無雙系列又急急腳斬多兩件。新嘅《真．三國無雙3：EMPIRE》，基本玩法不變，加入少少戰略元素再賣過，誠意確有限，上次隻《戰國無雙》已經令到唔少舖頭損手爛腳，隻限定版重由千一蚊跌到落五百幾都乏人問津，相信今次有行貨都未必炒得起，分分鐘遲買重有機會執平貨。而今個月除咗翻炒《無雙》系列外，重有《拳王2002》、《櫻大戰：巴里外傳》等，不過真係諗唔到04年究竟重有幾多人會買PS2《拳王2002》？
去到三月尾，日本國民級RPG《勇者鬥惡龍5：天空的新娘》Remake版，喺日本就例必大賣，香港人氣反而同《FF》相差好多，不過附送嘅《DQ8》影像碟相信會吸引唔少老機迷捧場。
XBOX剛推出嘅《鐵騎大戰》，雖然巨型手掣加遊戲賣成$1,400，不過由於對應XBOXLIVE關係，反而吸引到上集忍手嘅玩家。而近排至Hit嘅《忍者外傳》，普通版受歡迎過限定版，想平平哋買普通版就好快手。而UBISOFT上集大獲好評嘅間諜遊戲《SPLINTERCELL》，其續集亦鐵定會有行貨返，機迷唔怕捱炒價，最可惜係XBOX一眾Fans引頸以待嘅《DOAOnline》就宣布延期。
心水正Game有兩款，18號推出嘅《小飛俠阿童木》同25號嘅《北斗之拳》SEGAAGE再造版，前者曾推出口碑爆燈嘅GBA版，今番喺PS2上登場，令人期待。後者將1986年推出嘅世嘉MKIII版重造，以世嘉之前重造《夢幻之星》同《FANTASYZONE》嘅上佳表現，加上$200左右嘅定價，絕對係本月BestChoice。