上海崛起之後，浦東成為上海金融中心，金茂大厦（君悅酒店所在地）就係浦東地標，香港有馬主胡先生，大概係上海（浦東）人，名下馬匹皆以「浦東」為名，以前賓康馬房嗰匹「浦東之星」連贏六場，今季之「浦東精神」亦贏過兩場。講馬佬猛講「蒲東精神」，個個人去上海，都去「蒲東」。呢日食飯時間，碰到中文大學教務長何文匯教授，佢係正音專家，聽見我哋講「蒲東、蒲東」，立即放低筷子，對我哋講：「浦東不是蒲東，係合浦珠還之浦，係岸邊、沙灘咁解，浦不可讀作蒲，以前有藝員將日本藝人『三浦友和』讀成『三蒲友和』，跟住香港人就把浦東讀成蒲東，𠵱家無綫電視新聞就讀『浦東』，不讀『蒲東』，你哋應該學習。」
俾教授教訓完，返屋企查中大出版嘅《漢英小字典》，「浦」音pou（如浦口）；「蒲」音pouh（如蒲公英）。我哋成日講「蒲東」，錯晒。據一啲資料講，春秋時代楚國春申君為丞相，曾到今日之上海，疏通河道、河口，後人紀念春申君，稱上海為申，以前就有張《申報》；因浦為岸，春申君本姓黃名歇，故此上海灘頭古名係黃歇浦，後簡稱黃浦；知道「浦」嘅本字意思，就唔應該將佢讀為「蒲」啦。浦之東為浦東，浦之西為浦西，大家以後知道點樣讀字，電台講馬明星，請改正，「浦東精神」唔係「蒲東精神」呀。不過香港𠵱家幾乎人人叫「蒲東」，要糾正之，未必咁易。