地產多聲道:西武過海朗豪坊展拳腳

地產多聲道:西武過海朗豪坊展拳腳

鷹君集團就快開業嘅旺角商場朗豪坊,有唔少租客爭住進駐,究竟有幾吸引?睇吓連香港西武百貨都揀呢度做九龍區首家分店咪知囉。西武喺香港暫時只得金鐘太古廣場一家店舖。
對於呢項矚目租務協議,兩家公司喺下禮拜一(十五號)會開記者會解畫,鷹君副主席兼董事總經理羅嘉瑞,同迪生創建執行主席潘迪生,會齊齊出席主持大局。
潘迪生喺零售業界充滿傳奇,最經典一項,係迪生創建收購英國著名老牌百貨公司夏菲尼高,將佢脫胎換骨,為集團賺大錢;後尾佢重將間百貨公司私有化咗。
舊年十一月,迪生從日資手上購入香港西武逾一成三股權,令到香港西武成為迪生全資擁有嘅附屬公司。
香港西武揀朗豪坊開九龍區分店,潘迪生會講吓點樣令到新店成為旺角區遊客必到嘅購物熱點,相信同行都好有興趣想知詳情。

周啟邦舊屋有人吼
噚日利嘉閣黃富傑報料話,名人周啟邦夫婦持有嘅西貢大環頭一座面積四千二百呎嘅孖屋,啱啱賣咗畀個投資者,作價九百五十萬,每呎二千二百六十二蚊,造價偏低。
間屋好殘,兼且十幾年無人住,唔係個市咁旺,都吸引唔到投資者嘅興趣。周氏十幾年前買地起屋,之後無住又無出租,擺咗喺度唔理,𠵱家賣出,重有成千萬落袋。不過佢哋去年底沽出租金回報率極低嘅大坑道五十八號舊樓,蝕一千四百萬。

管理公司靠攞獎響名堂
𠵱家做物業管理公司真係唔容易,除日常工作外,不時要搞好多活動,例如參加形形色色嘅比賽爭奪獎項,以及參與社區關懷嘅活動等。
富城集團管理嘅新蒲崗采頤花園同樂富德強苑,參加「第五屆黃大仙區優質大廈管理比賽」,擊敗近百個對手,分別攞到冠軍及季軍。而置邦物業嘅牛池灣海港花園就攞到優異獎。業戶從呢啲獎項,可以知道佢哋為屋苑做咗唔少嘢。
另外,由富城員工組成「富城集團社區關懷小組」,上個月就喺轄下八個長者住屋,向長者住客派送共千五個福袋,重同長者玩遊戲及唱歌。

港客千萬元掃內地細單位
內地樓盤嘅單位,一般都係過千呎,其實中小型單位都好受歡迎。置業國際高級經理何偉杰話,上個周末,深圳寶安區嘅新陽.麗舍,開賣唔使三個鐘就賣清,樓盤建七座三層高住宅,共三百一十五伙,面積係三百七十七至九百二十六呎,呎價二百八十八蚊。
何偉杰指出,今日開賣深圳東門地鐵站旁嘅利聯.星桂園,首批四百幾伙,接獲六百個認購,都係三百幾至六百幾呎嘅單位。
另外,深圳中原策劃部楊建話,喺口岸區春風路嘅朗鉅.御風庭最近開賣,唔止出現排隊場面,首日重賣出二百幾伙,其中有個港客一口氣用咗成千萬,買入兩個全層。朗鉅.御風庭共有六百六十六個單位,面積三百幾到七百幾呎,最大都係得兩房,屬於小戶型樓盤,估唔到都咁好賣。

長成交期方便炒家甩貨
樓市興旺,吸引唔少投資者入市。聽講一個以前曾經好活躍嘅投資者,經歷金融風暴後,蟄伏多年,最近重出江湖,喺市場係咁掃貨,由豪宅到屋邨樓,甲級同乙級寫字樓都絕不手軟咁買。
佢買嘢嘅特色係要求賣方畀一個長成交期,等佢就有足夠時間出貨,佢買入嘅一批東區屋邨單位,好快咁賣咗一半嘞。
蘭西
電郵地址:[email protected]

羅嘉瑞同潘迪生(圖)好快會講解西武百貨喺九龍開店嘅詳情。

金鐘西武向來是高消費購物場所。

周氏夫婦對物業投資嘅興趣,似乎唔及出入Ball場咁大。

采頤花園攞到黃大仙區優質大廈管理比賽嘅冠軍。