所謂玉桑拿，即是以玉石鋪設嘅桑拿房同浴池，喺韓國，呢類桑拿比比皆是，深圳就暫時只得1間。自古有謂「枕玉而眠，長命百歲」，明代醫學家李時珍著《本草綱目》，亦指玉對人體有增強免疫力、防病治病、滋潤肌膚、調節神經等功效；講到咁堅，一於搵Karen同Rennee試試……
記者：陳真
攝影：王子
模特兒：Rennee（StarAsia）、Karen
2美少女起行前一晚通宵竹戰，攰到儍，拿拿臨去浴室洗個白白，開花灑，Rennee忽然大嗌：「好豪！」原來用作分隔客人用嘅屏風一樣以礦石裝飾，裝修果然夠落本。擦乾身，即刻跳入水溫差不多達攝氏50度嘅瑪瑙池。負責人解釋：「瑪瑙本身含有大量有機質同微生物，攝氏30度以上會散發出任何合成材料無法比擬嘅礦物質，舒筋活絡。」當真？Karen浸完15分鐘，話：「礦物質就Feel唔到，不過水溫夠熱，好舒服，成個人醒晒。」
再試以玉為藥石嘅玉溫池，負責人解釋：「玉石含有嘅微量元素對頭痛、失眠、神經衰弱、高血壓等有特殊功效，如果日日浸，重可以改善血液循環，增加活力，延年益壽……」水溫只得攝氏30幾度，2美少女嫌唔夠熱，浸唔夠5分鐘就起身鬆人，Rennee評語：「延年益壽？太誇張喇，治療頭痛就好似幾Work，之前未瞓夠頭痛到爆，浸完紓緩頭痛，呢樣就真嘅。」
最後試火玉水晶房，房間充斥紅外線，四壁鋪滿玉石、水晶，中間置稱為「熱石磐」嘅動力爐，釋放熱量。據講加熱過程中，玉石同紅外線會產生共振刺激全身，透過汗水帶走體內不良物質。30分鐘過後，2美少女有以下評語：「淨係知蒸一蒸，出完一身汗，𠵱家好精神。」
男賓專用黃土房，特別之處係「鹽焗」，房內放咗個鹽缸，將鹽搽上身再乾蒸，負責人話：「男人都有權貪靚，『鹽焗』有白滑肌膚、促進皮膚新陳代謝功效，焗完包你皮膚滑一滑。」不過蒸房溫度最高攝氏70幾度，頂唔順唔好勉強。黃土房隔籬重有間中藥瑪瑙房，據講放出嘅中藥蒸氣只得攝氏40幾度，可以強腎養胃、加速脂肪及皮膚細胞分解，係理想減肥方法咁話。
焗完桑拿，2美少女到上層歎全身按摩，可揀中、泰、韓式，其中以韓式比較特別，先將3個暖水包放喺大腿、胸口位置，等肌肉慢慢放鬆，最後先做全身按摩，最後做埋面膜，靚晒！
出完一身汗，Rennee同Karen見肚餓，即刻歎番碗正宗韓式牛尾湯（?40），再來1客炸醬麵（?20），前者夠香濃，後者麵身彈牙爽口，鹹鹹哋唔算太辣。
富麗華玉桑拿
地址：深圳市羅湖區深南東路2098號富麗華大酒店11至12樓
收費：各式桑拿任焗，?128包2小時中式按摩、?138包2小時泰式按摩、?158包2小時韓式按摩。
電話：香港直撥65200188/深圳直撥（86-755）13143860188
營業時間：24小時
交通：羅湖商業城乘的士（約?20）直達。
去東門南塘商業廣場逛一逛，雖然唔係新場，不過場內有2間新開張舖頭，售賣特色精品同精美和服，買番三兩件返香港，好歹都有戰利品。
新開張1星期，趣致蠟燭顏色鮮豔，下個月就係復活節，買定蠟燭無衰。
朋友一族
地址：東門南塘商業廣場B座2樓99號
電話：（86-755）13923877709
開張1個月，專售出口日本和服，及各類日式精品。
和服專賣
地址：東門南塘商業廣場B1-113-2
電話：（86-755）13923780669
