我羅拉上年曾經話過二十一歲嘅日本妖男成宮寬貴，大有機會靠妖突圍，點知佢到𠵱家都未有機會孭飛做男主角，令我有少少跌眼鏡。
滿以為成宮會放棄妖男形象做番乖仔，點知佢話知你有冇市場，繼續孤芳自賞，重設計咗一啲印有三個胸嘅兔仔同埋食人太陽花圖案嘅fanclub產品，嚇到fans都唔敢買！就連成宮即將推出嘅處男個人DVD《imagine》亦愈玩愈變態，重自稱係魔界轉生！
我羅拉其實都幾欣賞啲年輕人能夠堅持自己嘅信念，不過成宮今次唔單止塗甲油同戴假眼睫毛，重用身體作藝術道具，露體畫bodyprint。一般人視烏鴉為不祥物，但成宮喺隻碟入面，就故意整咗好多隻烏鴉出嚟，總之有咁邪得咁邪就最好！
成宮話：「我唔覺得不安喎，我以前都養過烏鴉，我本身就係一隻！我想將藝術同娛樂集大成，做張有message有刺激元素嘅作品，令睇嘅人嘅精神狀態可以提升。」睇怕大家同我一樣聽到一頭霧水！