有間製作公司嘅男高層，平日就好鍾意劈酒作樂，本來爛飲係佢個人嘅事，但佢就衰鹹濕，次次都借酒行兇抽人水，所以好多女星一見到男高層貓貓地，都即刻九秒九鬆人。
男高層對性感女星情有獨鍾，佢有幾次同成班人唱K，借啲酒意就行埋去性感女星身邊，一手環抱佢條腰近胸底處，性感女星梗係即時縮埋兼以手頂住，然後借啲意扮同人傾偈行開。
性感女星被男高層抽水敢怒不敢言，因為佢怕開口鬧佢嘅話，會得罪男高層，所以都係啞忍就算。不過男高層惡行昭彰㗎啦，基本上佢唔止對性感女星係咁，佢但凡飲醉酒，都對身邊嘅女性鹹豬手，呢樣嘢真係好唔要得，真係想睇吓佢幾時索油索着火水。
陳松伶噚日到港台出席活動，對於無綫旗下藝員受減騷影響，松松就話自己好好彩，因為佢一早已經同無綫改簽咗部頭合約。不過松松就覺得呢件事可以從正反兩方面睇，松松又話羅蘭姐都覺得可以隨自己揀騷，未嘗不是一件好事。
「第十五屆電視節目欣賞指數調查」頒獎禮會喺下周五舉行，噚日港台就舉行記招，率先公布首二十個最高欣賞指數節目，當中港台佔了九個，無綫佔了六個，亞視則有三個，有線亦有兩個。而二十個節目中多以資訊性節目為主，電視劇集就僅得兩套高收視的《衝上雲霄》同《戇夫成龍》入圍。
黃伊汶前晚着住成身贊助去睇時裝騷，大騷玉背，佢話多得啲贊助，上年秋冬季買衫就慳咗成六位數字，當中重掃咗唔少furitems。黃伊汶又話夏天會繼續行型格性感，𠵱家努力狂煲時裝書，主攻絲襪同短褲呢類貼身打扮，大家記得拭目以待喇。
最近同女朋友張佩金因車禍受傷入院嘅洪子軒（Harry），經過十多日留醫後，將會喺明日出院。佢喺長途電話度話院方卒之批准佢入深切病房探女友，佢話估唔到張佩金真係傷得咁重，佢又話：「佩金見到我都好開心。」Harry會喺上海租屋，方便照顧女朋友。
李連杰兩年前曾經被斟拍《青蜂俠》嘅電影版，飾演李小龍六十年代都喺電視劇做過嘅角色加藤。噚日荷李活有消息傳出，飾演青蜂俠嘅人選，暫定係班亞弗力（BenAffleck）。睇嚟李連杰好有機會首次同班仔合作，喺銀幕上儆惡懲奸。
汪禹嘅前女友杜貞貞，噚日遭稅局入稟區域法院，向她追討九千九百三十三元薪俸稅。入稟狀指被告人杜貞貞未能繳付○○年一月至○一年二月嘅薪俸稅，稅局現追討有關欠交稅項連利息同訴訟費。對於欠稅一事，杜貞貞噚日喺電話度話：「因為我烏龍，搬咗屋收唔到稅單，我會去稅局搞番清楚件事。」
案件編號：DCTC4712/04
