廉署助查冇飲咖啡
Juno銘記陳少寶叮囑

麥浚龍（Juno）自從廉署「舞影行動」後，銷聲匿迹了近半年時間，不過他日前接受訪問時卻指這是計劃之內，絕不是受到「舞影行動」影響。對於被廉署邀請協助調查一事，Juno十分風趣地說並沒有品嘗過廉署最出名的咖啡。

麥浚龍自出道以來都有不少負面新聞，對此他絕不介懷，日前接受訪問時Juno說：「批評我嘅外貌我都唔會理，如果我介意嘅話，我諗出道三個月就退出啦。我覺得好多時藝人都係被動嘅一方，人哋點落筆我控制唔到，不過我最介意人哋將我講嘅嘢扭曲嚟寫。」

「少寶係我恩師」
對於環球唱片公司前高層陳少寶涉受賄一事，Juno表示：「少寶可以話係我恩師、伯樂，我真係好尊重佢。我好記得佢曾經同我講過一番說話，佢話『唔使介意人哋點睇，每個藝人有自己嘅路，冇人可以去取代你，你亦都唔可以取代其他人』，呢番話對我嚟講好有用。」
在「舞影行動」中，Juno父親麥紹棠亦有到廉署助查，問他可覺牽連家人，他說：「我哋當日只係盡市民責任，但經過呢件事之後，阿爸都冇話特別緊張我嘅工作，我哋喺屋企係絕對唔提公事。」

「唱歌唔為攞獎」
而Juno更提及當日於廉署並沒有喝過咖啡，他笑說：「我嗰日冇飲過咖啡，可能我當時都唔覺得口渴，嗰日之後，余文樂同霆鋒都有sendmessage叫我唔使咁擔心。」
不過自「舞影行動」之後，有部份頒獎禮因而改制，問Juno可有覺得得獎機會因而減少，他說：「呢啲嘢亦都唔係由我去話事，每個台有自己嘅機制，我唱歌只係着重個過程開唔開心，並唔係為咗去攞獎。」
採訪：李珮洳
攝影：陳烱威
化妝：MaeVon@faces
髮型：EdmondLeung@Tete
場地提供：HairCraft