由蘇格蘭男星伊雲麥葵格（EwanMcGregor）主演嘅《大魚奇緣》，係荷李活鬼才導演添布頓（TimBurton）繼○一年《猿人爭霸戰》後嘅最新作品，今次呢套片仍然充滿添布頓一貫奇幻詭異嘅色彩，而且天馬行空嘅幻想力重勁過以前嘅作品㖭。
《大魚奇緣》個古仔係講主角艾活（伊雲麥葵格飾）鍾意自吹自擂，成日四圍同人講自己年輕時浪迹天涯嘅奇遇，重話見過超級巨人、馬戲班人狼同連體孿生姊妹花等。
大家都好鬼佩服艾活，惟獨佢自己個仔就由細到大都覺得佢作嘢多過食飯，因此兩父子嘅感情就愈嚟愈差，直至艾活身患重病，離家出走咗幾年嘅仔先識後悔，重真正體會到佢阿爸精采嘅人生㖭，聽落好似早幾年香港嗰套《新難兄難弟》咁上下喎！不過論創造力就真係有過之而無不及啦！
導演添布頓早前接受本報記者專訪時就話，《大魚奇緣》正好講明世事其實好虛幻，真同假有時都好難去分，佢話：「即使我經常喺報紙上出現，我都有一種好虛幻嘅感覺，所以真實同虛假嘅界線其實係好模糊㗎，尤其係我哋提及過去或者講古仔嘅時候，即使講出來嘅係事實，可能都會有啲出入，相反小說中嘅故事又唔係全部都係假嘅，都有真實嘅一面，可能有啲事實，大家都會當成係假嘅呢。」
特約記者JoleighLo紐約直擊
