AC米蘭大勝布拉格斯巴達，最開心莫過於為AC埋齋嘅加度素。佢可能冇乜幾可除衫慶祝，動作唔多靈活，而佢因慶祝過激領咗面黃牌，唔多唔少影響到未來比賽。大家理解佢難得入波情難自控，但係咪不智就由看官判斷啦。
眼見恩沙基上半場入完波後除衫除得鬼咁瀟灑，到佢自己入完波後重唔有樣學樣就勢係假。但家吓波衫啲內膽鬼咁複雜，唔係話除就除，搞到佢有啲雞手鴨腳，要隊友幫忙。佢之後套件衫喺角球旗揮舞，被球證出示黃牌警告。以加度素踢法好易領牌，咁就浪費個quota又唔多值得喎。
講番場波，當AC一度被扳平後氣氛鬼咁緊張，齋睇教練安察洛堤起勢煲煙就知佢幾肉緊。多得斯巴達迫得AC搶攻，至令場波多波入。
唔知大家對於上周足總盃曼聯對富咸，傑斯喺比賽後段串演左後衞有冇印象呢？嚟緊周日英超聯曼聯作客對曼城，大家就有機會再睇多次嘞。因為隊長堅尼、科東尼及施維斯達有傷，加利仔停賽，後防唔夠人用，計落真係得傑斯填番呢個位最啱，希望佢將來打多瓣防守波啦！
自從轉會皇馬之後，萬人迷碧咸就一直表示希望有機會代表皇馬對番母會曼聯，但隨住曼聯啱啱喺歐冠盃出局，睇嚟佢呢個願望最快都要等到下季至可以實現。對於曼聯出局一事，碧咸話佢一直覺得曼聯可順利擊敗波圖晉級，𠵱家就有啲意外。咦，咁佢算唔算講緊風涼話呢？
好多球員都希望入選國家隊踢今屆歐洲國家盃，好似米杜士堡中堅伊奧古咁，話自己今季表現唔差，有能力幫英格蘭喺決賽周攞好成績，重拉埋隊友修夫基落水。我求大俠當然唔睇好，雖則呢位三十一歲後衞以前曾經入選，但係以艾歷臣志切將球隊年輕化，真係妙想天開。
范志毅離開澎馬流浪加盟中甲珠海中邦，但「范將軍」日前同上海國際友賽時，竟然出手打球證，事件驚動球會高層，結果遭訓話之餘，亦扣一個月人工。球員踢波一時火遮眼在所難免，但係以「范將軍」咁有經驗球員，我求大俠勸佢控制吓情緒，始終好多人以佢為榜樣。