昨日大家最熱門嘅話題，除咗係大市跌完未之外，就係兩隻新掛牌股份嘅表現，濰柴動力（2338）表現勁抽，超人系嘅TOMOnline（8282）令人失望。
經紀黃話，TOMOnline表現弱過藥煲，其實事出有因，一來係大市唔就之故，二來因為隻股在港美兩地同時掛牌，有大行trader玩套戥，喺美國高位先作拋空，然後再在本地低位補貨，總之就係搞到本地散戶暈得一陣陣。
濰柴噚日最高13.90元，最低都有12.80元，收市價13.45元，較招股價高28%，大跌市中有咁嘅表現，除咗講個勁字之外，實在冇嘢好講。
TOMOnline噚日表現令人失望，收1.40元，較招股價低6.67%收市，雖然唔係話跌好多，但超人效應竟然失靈，兼夾打破近來逢新股必升的定律，加上有濰柴勁升作比較，真係相當肉酸，難為唔少師奶抱有好大期望，走去抽新股捧場。
經紀黃話，由於一般散戶唔容易玩套戥，叫小初不如當睇少隻。
慕容小初