土共搞特區文革，多名富商政客出嚟教訓香港人點樣愛國，點知遭到踢爆，原來佢哋自己通通持有美國籍、加拿大籍或英籍。
正如民建聯主席馬力批判議員吳靄儀：揸英國籍護照，就係英國人，外國人冇資格審議評論香港事。馬主席呢番說話無疑好深得人心，繼中方列出「四類人」不准出任立法會議員之外，（即「黑四類」）港區人大代表薛鳳旋，繼續深化愛國原則，向人大建議，有三類人，因為參與管治特區，簡稱「紅三類」，亦不准持有外國籍嘅護照。
邊三類呢？曾經瞓身支持起大亞灣核電廠，並叫港人若然唔滿意就可以去跳海嘅薛鳳旋話：一，特區所有政務官（即俗稱AO）；二，主要諮詢及法定機構如醫管局、貿發局、金管局、證監會、銀監會、機管局及九鐵等主席及行政總裁；三，全體立法會議員。薛鳳旋又點名馮國經叫陣，叫佢放棄美國籍。
愛國要看行動，薛鳳旋確立「紅三類」，無疑極有必要。不過，鑑於太多嘅愛國黃面孔、富商或土共，口中愛祖國，袋中護照係美國；或者日日盛讚祖國偉大，實質老婆仔女送晒去加拿大，薛鳳旋嘅「紅三類棄外國護照」動議，打擊面可能太大，到頭來獲得胡溫點頭、人大舉手通過嘅機會好微。
首先，係啲政務官，政務官本來殖民地時代係天之驕子，但俾廢董一招「空降部長制」封咗頂，一世人點樣做牛做馬，最高只可以升到做常務秘書長，加埋好多AO係三年短期合約，剝奪佢哋美加英籍護照優等公民地位，叫佢搏一份三年後冇得續約，或即使做到曾蔭權咁高都要俾港澳辦嘅一名月入三千元人民幣嘅芝麻官面省嘅AO，睇怕冇乜吸引力。
其次，薛教授份紅三類名單，要求行政、立法都要乳豬全體式做晒中國人，但根據國家最近訓示：「治港者」係指行政、立法、司法三大權力班子，咁終審庭、上訴庭等各級大法官，係咪亦應該全部要係中國籍？換言之，現時大量鬼佬大法官，一係就好似盧維思一樣，娶個中國老婆，好似和尚還俗咁，轉入中國籍，將效忠對象，由英女皇轉為胡溫，否則，佢哋應該全部執包袱返祖家，讓我國徹底收回特區嘅司法主權。
唔使憂唔夠法官，祖國十三億人口，多的是人才，國家有好多人民法庭嘅審判長，由五十年代土改開始，已經累積大量住對布鞋、印印腳公審地主、槍斃反革命豐富司法經
至於醫管局、貿發局、證監會等正副頭目要持係中國籍，都重未夠。薛鳳旋漏咗馬會董事局主席及行政總裁、發鈔嘅滙豐銀行大班、八間大學正副校長、全港各藍籌股大企業董事局主席、全港各電子及印刷傳媒老闆、督印人及總編輯，佢哋亦係參與管治香港及具有重大影響力嘅中堅力量，呢班人揸住外國護照，始終唔係咁令人放心。
至於薛鳳旋點解個個都放過，係都要點名馮國經叫佢放棄美國籍？呢一招亦好高章。因為阿域陀．馮係胡應湘爵士近日點名嘅「第三屆特首四條煙」名列第一嘅心水人物，薛教授點名叫佢放棄外國籍，若然域陀猶豫兩頭望，扮聽唔到，咁就即時測試到佢有幾「愛國」嘞。薛教授果然係鬥爭高手喎。
傳真︰2623-9278
電郵︰